हिमाल प्रेस 
काठमाडौँ- फिल्म ‘सारंग’ को पोस्टर सार्वजनिक भएको छ। पोस्टरसहित निर्माण टिमले मंसिर ७ गतेलाई प्रदर्शन मिति तोकेका छन्।
मंसिर ७ गते घनश्याम लामिछानेको निर्देशन रहेको ‘अग्निदहन’, बाबुसाहेब बलामी निर्देशित ‘देववाणी’ र विपिन कार्की मुख्य भूमिका रहेको ‘तेलः भिसा’ भिड्ने छन्। यी फिल्मको केही समयअघि नै प्रदर्शन मिति तोकिएको थियो।
‘सारंग’ पोस्टरमा अभिनेत्री ऋचा शर्मा, अभिनेता उत्पल झा, बाल कलाकार सम्राट थापा र आदित्य कार्की छन्। फिल्म बालमनोविज्ञान, बालअधिकार तथा धनी र गरिब परिवारबीचको कथामा आधारित छ।
प्रशान्त तामाङले लेखन र निर्देशन गरेको फिल्ममा समीरमणि दीक्षित, सुरज तमु, मणि के.राई, अनीषा न्यौपाने, नीरज ब्ल्याक, दीपिका थापा, सुमन सागर जंग केसी, विश्व स्याङ्वो, र प्रभातजंगको अभिनय छ।
दर्शन बुद्ध फिल्मस्को ब्यानरमा निर्माण गरिएको फिल्मका छायाँकार गोपाल राय हुन्। मित्र ध्वज गुरुङले फिल्मको सम्पादन गरेका फिल्ममा डीपी खनालको शब्द, शंकर थापा ‘स्माइल’ को संगीत छ।
