यसरी सकियाे नेपाली र अमेरिकी सेनाको संयुक्त सैन्य अभ्यास (तस्बिरहरू)

काठमाडौँ- नेपाली सेना र अमेरिकी सेनाबीच सुरू भएको संयुक्त सैन्य अभ्यास सम्पन्न भएको छ। भदौ ३० गतेदेखि सुरू भएको दुवै देशबीचका सेनाहरूको ‘प्यासिफिक एन्जल’ शुक्रबार सम्पन्न भएको हो। नेपाली सेना र संयुक्त राज्य अमेरिकी सेनाबिच विगत लामो समयदेखि विपद् व्यवस्थापन तथा मानवीय सहयोगको क्षेत्रमा अनुभव आदानप्रदान गरी विपद् प्रतिकार्य क्षमता अभिवृद्धि गर्ने उद्देश्यले विभिन्न अभ्यासहरू सञ्चालन हुँदै आई रहेका छन् ।

विपद् व्यवस्थापन तथा मानवीय सहयोगको क्षेत्रमा अनुभव आदानप्रदान गरी विपद् प्रतिकार्य क्षमता अभिवृद्धि गर्ने उद्देश्यले सैन्य अभ्यास गरिएको नेपाली सेनाको जनसम्पर्क तथा सूचना निर्देशनालयले जनाएको छ। यस प्रकारका अभ्यासहरूबाट विशेषज्ञता आदानप्रदान हुन गई सैनिक पेसागत क्षमता अभिवृद्धिमा थप मद्दत पुग्दै आएको नेपाली र अमेरिकी सेनाले बताउँदै आएका छन् ।

अभ्यासका क्रममा विपद्का दौरान सञ्चालन गरिने विभिन्न प्रकारका खोज तथा उद्धार कार्यलाई थप प्रभावकारी बनाउन अपनाउनुपर्ने विधि तथा प्रक्रियाका सम्बन्धमा ज्ञान आदानप्रदान भएको नेपाली सेनाले बताएको छ। संयुक्त अभ्यास काठमाडौँ, मकवानपुर र धादिङ जिल्लमा सञ्चालन भएका थिए। दुवै देशका सैनिकले सन् २०१२ देखि संयुक्त अभ्यास गर्दै आइरहेका छन्। २०१२ यता अभ्यासको यो चौथो संस्करण हो ।

तस्बिरहरू : नेपाली सेना