हिमाल प्रेस 
रसुवा- आन्दोलनरत मजदूरको ढुंगा प्रहारबाट रसुवाको मैलुङमा चार प्रहरी घाइते भएका छन्।
आमाछोदिङ्मो र उत्तरगया गाउँपालिकाको सिमानामा निर्माणाधीन दुई सय १६ मेगावाट ‘अपर त्रिशूली–वान’ जल विद्युत् आयोजनाको मैलुङस्थित कार्यालयमा आन्दोलनरत मजदूरबाट प्रहार भएको ढुंगामुढाले सुरक्षाकर्मी घाइते भएका हुन्।
घाइते सुरक्षाकर्मीको स्थानीय स्वास्थ्य संस्थामा उपचार भइरहेको र उनीहरूको अवस्था सामान्य रहेको प्रहरीले जनाएको छ। आयोजनामा कार्यरत मजदूरको काम गर्ने समय फेरबदल गराई जिम्मेवार पक्षले कामदारलाई आफ्ना नीति र सिद्वान्तको विषयमा प्रशिक्षणमार्फत स्पष्ट गराउन नसकेकाले आन्दोलनमा उत्रेको मजदूरहरूले बताएका छन्।
उनीहरुले आयोजनाको साइट अफिस तथा आवासमा ढुंगा प्रहार गर्दा केही झ्याल तथा ढोकाका सिसाहरू फुटेका छन्। मजदूरलाई श्रम शोषण गर्ने गराउने अभिप्रायले पाइराखेको मजदुरी ज्याला घटाएकाले आन्दोलनमा उत्रिन परेको कामदारले बताएका छन्।
रसुवाका प्रमुख जिल्ला अधिकारी वेदनिधि खनालले मजदूरबाट स्थिति भयावह भएपछि सुरक्षा अवस्था सुदृढ पार्न सुरक्षाकर्मीद्वारा लाठी एवं केही राउन्ड अश्रुग्यास प्रहार गरिएको बताए।
घटनास्थलमा सशस्त्र प्रहरी र नेपाल प्रहरीका प्रहरी नायब उपरीक्षकहरूको कमान्डमा गएको सुरक्षा फौजले मात्र आन्दोलन नियन्त्रणमा लिन नसकेपछि छिमेकी जिल्ला नुवाकोटबाट थप सुरक्षाकर्मी झिकाइएको थियो। रासस
