हिमाल प्रेस 
प्रा. कृष्ण गौतम, पवन चाम्लिङ र केदारभक्त माथेमा।
काठमाडौँ- पद्मश्री साहित्य पुरस्कार प्रा. कृष्ण गौतमको उपन्यास ‘अद्वैत’ लाई अर्पण गर्ने निर्णय गरिएको छ। खेमलाल-हरिकला लामिछाने प्रतिष्ठानले उक्त निर्णय गरेको अध्यक्ष जीवा लामिछानेले जनाएका छन्।
यसैगरी पवनकुमार चामलिङलाई पद्मश्री साधना सम्मान अर्पण गर्ने निर्णय गरिएको प्रतिष्ठानले जारी गरेको विज्ञप्तिमा उल्लेख छ। केदारभक्त माथेमालाई पद्मश्री गौरव पुरस्कार अर्पण गर्ने निर्णय गरिएको छ ।
प्रतिष्ठानलाई प्राप्त १८७ पुस्तकमध्ये विस्तारित सूचीमा १५ पुस्तक तथा संक्षिप्त सूचीमा ५ पुस्तक सार्वजनिक गरिएको थियो। द्वैत, अद्वैत तथा बहुलवादमा आस्था भए पनि मानवताको सार मूलतः एक रहेको तथा विश्वास, मत र मार्गहरू अनेक भए पनि मुहान एक रहेको व्याख्या गर्दै मानव समाजमा समभाव, समानुभूति तथा ऐक्यबद्धता स्थापना गर्ने विषयमा अत्यन्तै परिस्कृत तथा बोधगम्य भाषा र शैलीमा अद्वैत उपन्यास लेखिएको प्रतिष्ठानको विज्ञप्तिमा उल्लेख छ।
समालोचक कृष्ण गौतम पूर्वीय तथा पाश्चात्य दर्शन र साहित्यका गहन अध्येता तथा उत्तरआधुनिक सिद्धान्तका व्याख्याता हुन्। गौतमका समालोचनात्मक र आख्यानात्मक एक दर्जनभन्दा बढी पुस्तक प्रकाशित छन्। गौतमको अद्वैत उपन्यासले २०८० को ‘कविडाँडा राष्ट्रिय आख्यान पुरस्कार’ पनि पाएको छ। पुरस्कारको राशि १ लाख २५ हजार रुपैयाँ र कदरपत्र छ।
यसैगरी नेपाली भाषा, साहित्य तथा संस्कृतिको उन्नयनका लागि सिर्जना, पत्रकारिता तथा साहित्यिक गतिबिधिमा दीर्घकालसम्म निरन्तर सक्रिय रहेका साहित्यिक अभियन्ता तथा चिन्तक चामलिङलाई पद्मश्री साधना सम्मान अर्पण गर्ने निर्णय गरिएको प्रतिष्ठानले जनाएको छ। चामलिङ भारतको सिक्किम राज्यका पूर्वमुख्यमन्त्री हुन्।
समतामूलक समाज निर्माणका लागि निरन्तर योगदान गरेबापत त्रिभुवन विश्वविद्यालयका पूर्वउपकुलपति, पूर्वराजदूत तथा नागरिक समाजका अभियन्ता माथेमालाई पद्मश्री गौरव पुरस्कार अर्पण गर्ने निर्णय गरिएको विज्ञप्तिमा उल्लेख छ। यी पुरस्कारको राशि जनही ३ लाख रुपैयाँ तथा सम्मानपत्र छ।
