हिमाल प्रेस 
महोत्तरी– महोत्तरीसहित मधेशमा चौठचन्द्र पर्व नजिकिँदै गर्दा केराको माग उच्च भएको छ। मधेशका प्रायः बजार क्षेत्रका चोकचोकमा अहिले बिक्रीका लागि केरा राखिएका छन्।
चौठचन्द्र पर्वका अवसरमा चन्द्रमालाई केरा चढाइने चलन रहेको छ। भदौ शुक्लपक्षको चौथी तिथिको चन्द्रमाको आराधना गरिने यो पर्व आगामी शुक्रबार साँझ मनाइँदैछ। मिथिलामा चौठचन्द्र पर्व महत्वपूर्ण पर्वमध्ये मानिन्छ। अहिले पर्वका लागि आफ्ना उत्पादित कृषि उपज बजार पुर्याउने किसान र व्यापारी तथा सामान किन्न पुग्ने उपभोक्ताको सघन जमघटले पर्वका बजार बिहानैदेखि जम्ने गरेका छन्।
चौठचन्द पर्व केराखेती गर्ने किसानलाई खास अवसर बन्ने गरेको छ। अहिले चौठचन्द्र पर्वको मुखमा बेचिएको केराबाट रु. दुई लाख प्राप्त भइसकेको भंगहा–४ रामनगरका किसान सत्यनारायण यादवले बताए। उनले १० कठ्ठा क्षेत्रफलमा केराखेती लगाएका छन्। जिल्लाभरिमा चौठचन्द्र पर्वमा रु. ५० लाख हाराहारीको केरा किनबेच हुने महोत्तरी उद्योग वाणिज्य संघको अड्कल छ।
पर्वका लागि छिप्पी नसकेका कलिला कोसाका केरा पनि प्रशस्तै देखिएको छ। यसैगरी पर्वको बजार भोलिसम्म मात्र हुँदा कलिला केरा कार्वाइड हालेर पकाइएका छन्।
पर्वमा भीडभाडका बेला पारेर अन्य कमसल गुणस्तरका सामान पनि बिक्री भइरहेको हुँदा स्थानीय प्रहरी प्रशासन, उद्योग वाणिज्य संघ र सामाजिक संघसंस्थाले बजार अनुगमन बढाउनुपर्ने उपभोक्ता हकहित संरक्षण केन्द्र महोत्तरीका अध्यक्ष दीपेन्द्र पराजुली बताउँछन्।
