हिमाल प्रेस 
सुर्खेत –भेरी पम्पिङ खानेपानी उपआयोजनाको पहिलो चरणको कामका लागि चिनीयाँ कम्पनी जि—ज्याङ टिम्स इन्टरनेशनल इक्नोमिक एण्ड टेक्निकल को–अपरेशन कम्पनीसँग हस्ताक्षर भएको छ। बुधवार एक कार्यक्रम गरी वीरेन्द्रनगर नगरपालिकाका प्रमुख मोहनमाया ढकाल, उपआयोजना कार्यान्वयन गर्ने खानेपानी क्षेत्रगत सुशासन तथा पूर्वाधार सहयोग आयोजना वीरेन्द्रनगर आयोजना कार्यान्वयन इकाईका प्रमुख संजीवकुमार साह र काम गर्ने चिनीया कम्पनी जि—ज्याङ टिम्स इन्टरनेशनल इक्नोमिक एण्ड टेक्निकल को–अपरेशन कम्पनीका प्रतिनिधि सुशीलकुमार श्रेष्ठले संयुक्तरुपमा त्रिपक्षीय सम्झौतापत्रमा हस्ताक्षर गरेका हुन्।
त्रिपक्षीय हस्ताक्षर भएपछि अब आयोजनाको पहिलो चरणको काम सुरु हुने बताइएको छ। भेरी नदीको पानीलाई पम्पिङ गरी लिफ्टको सहायताले वीरेन्द्रनगरमा ल्याइ उपभोक्ताहरुलाई वितरण गर्न विश्व बैंकको सहयोगमा यो उपआयोजना सुरु भएको हो।
खानेपानी क्षेत्रगत सुशासन तथा पूर्वाधार सहयोग आयोजना वीरेन्द्रनगर आयोजना कार्यान्वयन इकाईका प्रमुख संजीवकुमार साहले गत वर्षको असोजमा कामका लागि ठेक्का आव्हान गरिएकोमा सातवटा कम्पनीले ठेक्का हालेको र त्यसमा दुईटा कम्पनी अयोग्य भएपछि पाँच वटा प्रतिस्पर्धामा रहेको बताए।
पाँचवटा कम्पनीमध्ये चिनीयाँ कम्पनी जि—ज्याङ टिम्स इन्टरनेशनल इक्नोमिक एण्ड टेक्निकल को–अपरेशन कम्पनी लि. ले २४.०८ प्रतिशत घटेर तीन अर्ब पाँच करोड आठ लाखमा यो कामको ठेक्का प्राप्त गर्न सफल भएको उनले बताए।
वीरेन्द्रनगर—१० को अमृत डाँडामा ९० लाख लिटरको पानी जम्मा गरिनेछ। यसका साथै २९ किमी पाइप विछ्याइनेछ। यसैगरी आयोजनाको परामर्शदाता एमएसडी कम्पनीका विज्ञ सुरेश महाजुले भेरी नदीबाट ५६० लिटर प्रति सेकेण्ड पानी लिफ्ट गरिने जानकारी दिए। उपआयोजनाको पहिलो चरणको कामको अवधि तीन वर्ष रहेको छ।
उपआयोजनाको निर्माणको ठेक्का प्राप्त गरेको चिनीयाँ कम्पनी जि—ज्याङ टिम्स इन्टरनेशनल इक्नोमिक एण्ड टेक्निकल को–अपरेशन कम्पनी लि.का प्रतिनिधि सुशीलकुमार श्रेष्ठले काममा कुनै अवरोध नभए तोकिएको समयभित्रै सबै काम सम्पन्न गर्ने लक्ष्य लिइएको जनाए।
अहिले ६ दिनमा एकपटक मात्र पानी आउने भएकाले चर्को अभाव भोगिरहेको बेला यो आयोजना सम्पन्न भएमा खानेपानीको समस्या समाधान हुने सुर्खेत उपत्यका खानेपानी संस्थाका अध्यक्ष कूलमणि देवकोटाले बताए।
उपआयोजना कार्यान्वयन गर्ने खानेपानी क्षेत्रगत सुशासन तथा पूर्वाधार सहयोग आयोजना वीरेन्द्रनगर आयोजना कार्यान्वयन इकाईका संयोजक एवं वीरेन्द्रनगर नगरपालिकाका प्रमुख मोहनमाया ढकालले सन् २०५० सम्म वीरेन्द्रनगरको जनसंख्यालाई लक्षित गरी भेरीको पानी लिफ्ट गरेर ल्याउन लागिएको बताए।
पम्पिङ गरेर ल्याउन लागिएको नेपालकै सबैभन्दा ठूलो आयोजना भएको दावी गर्दै उनले यस आयोजनाले खानेपानीको दीर्घकालीन समस्या समाधान गर्नेमा विश्वस्त रहेको जानकारी दिए। आयोजना निर्माणको काममा कुनै अवरोध आए समाधान गर्दै जाने प्रतिवद्धता व्यक्त गर्दै उनले ढुक्क भएर समयै काम सक्न निर्माण कम्पनीलाई आग्रह गरे।
