हिमाल प्रेस 
काठमाडौँ- घरेलु टोली आर्सनलले इंग्लिस प्रिमियर लिगमा विजयी सुरुआत गरेको छ। आर्सनलले शनिबार उल्भरह्याम्पटनविरुद्ध २-० को जित निकाल्यो।
इमिरेट्स रंगशालामा आर्सनललाई जित दिलाउन काइ हार्भट्ज र बुकायो साकाले गोल गरे। खेलको २५औं मिनेटमा हार्भट्जको गोलमार्फत आर्सनलले अग्रता लिएको थियो । उनले साकाको पासलाई पोस्टको दिशा दिए।
साकाले ७४औं मिनेटमा हार्भट्जको पासलाई सदुपयोग गर्दै आर्सनललाई सहज जित दिलाए। यसैगरी शनिबार नै सम्पन्न खेलमा ब्राइटनले एभर्टनलाई ३-० र न्युक्यासल युनाइटेडले साउथह्याम्पटनलाई १-० ले पराजित गरे।
लिभरपुलको सहज जित
लिभरपुलले शनिबार यसै सिजन प्रिमियर लिगमा उक्लिएको इप्सविच टाउनलाई २-० ले हरायो। इप्सविच टाउनस्थित पोर्टम्यान रोड रंगशालामा लिभरपुललाई जित दिलाउन डियागो जोटा र मोहम्मद सलाहले गोल गरे।
खेलको ६०औं मिनेटमा जोटाको गोलमार्फत लिभरपुलले अग्रता लिएको थियो। उनले सलाहको पासलाई जाली चुमाए। पाँच मिनेटपछि नै सलाहले टोलीको अग्रता दोब्बर बनाए।
