काठमाडौँमा पार्किङ गरेर राखिएको बसभित्र भेटियो शव

काठमाडौँ- काठमाडौँमा पार्किङ गरेर राखिएको बसभित्र शव भेटिएको छ। काठमाडौँ महानगरपालिका-२६ गोँगबुस्थित नयाँ बसपार्कमा पार्किङ गरेर राखिएको बा २ ख २३४४ नम्बरको बसभित्र इटहरी उपमहानगरपालिका-१३ का ३७ वर्षका प्रल्हाद अधिकारीको शव मंगलबार साँझ फेला परेको हो।

‘एक/दुई दिनअघि नै मृत्यु भएको जस्तो शव बसभित्र भेटिएको छ,’ जिल्ला प्रहरी परिसर काठमाडौँका एसपी नवराज अधिकारीले भने, ‘घटनाबारे अनुसन्धान जारी छ। अहिलेसम्म कसरी घटना भयो। हत्या हो या के हो खुलेको छैन।’

प्रहरीको प्रारम्भिक अनुसन्धानमा उक्त बस दुई महिनायता बसपार्कमै पार्किङ गरेर राखिएको खुलेको छ।  मृतकको शव पोस्टमार्टमका लागि त्रिवि शिक्षण अस्पताल महाराजगञ्जमा पठाइएको प्रहरीले जनाएको छ।