हिमाल प्रेस 
पवन परियारलाई सान्त्वना दिँदै आफन्त, पहिरोमा परेको उनको घर र पहिरोमा परेर घाइते भएका कुमार परियार। तस्बिर : हिमालप्रेस
कास्की- यस वर्षको मनसुन सुरु भएपछि पहिरोमा परेर कास्कीमा हालसम्म १४ जनाको मृत्यु भएको छ। घटनामा ६ जना घाइते भएका छन्। यसबीचमा जिल्लामा बाढीपहिरोका ३३ र अविरल वर्षाका ६१ वटा घटना घटेका प्रहरीले जनाएको छ।
जिल्ला प्रहरी कार्यालयका अनुसार विपद्मा परेर पोखरा महानगरपालिकामा १२ र मादी गाउँपालिकामा दुई जनाको मृत्यु भएको छ। पोखरा महानगरपालिका–१९ पुरुनचौर तल्लाकोटका गत असार २७ गतेको पहिरामा परी स्थानीय कुलबहादुर परियारको परिवारका ६ सहित सात जनाको ज्यान गएको थियो।
पहिरोमा परेर कुलबहादुरसहित उनका आमा ८५ वर्षीया लक्षिमा, पत्नी ४३ वर्षीया मनकुमारी, छोरी १५ वर्षीया प्रशना, २० वर्षीया प्रभा र ज्वाइँ २५ वर्षीय अस्मित परियार तथा छिमेकी ५६ वर्षीया राधिका परियारको मृत्यु भएको थियो।
यसै गरी सोही रात पोखरा महानगरपालिका–३२ चैनपुरस्थित बाह्रबीसेमा ४० वर्षीया आरती ओझोको घर पहिरामा पुरिँदा १८ वर्षीया अनिता ओझा, ११ वर्षीया अनुष्का ओझा र ९ वर्षीय प्रतिक सुवेदीको मृत्यु भएको थियो। यसैगरी असार २७ गते राति मादी गाउँपालिका–११ ताप्लेमा गएको पहिरामा परेर ८० वर्षीया माइतीकुमारी गुरुङको ज्यान गएको थियो।
गत असार २६ गते पोखरा महानगरपालिका–२७ का २२ वर्षीय भीमबहादुर थापाको घरमै सुतेको अवस्थामा पहिरामा परेर निधन भएको थियो। गत असार १२ गते रातिको घटनामा कास्कीको मादी गाउँपालिका–५ चितेपानीकी १३ वर्षीया आयुस्मा रानाभाटको मृत्यु भएको थियो।
सोही दिनको घटनामा पोखरा महानगरपालिका–२७ आरुपाटाका ३१ वर्षीय हरि सुनारका छोरा तीन वर्षीय अनमोल सुनारको पहिरामा परेर ज्यान गएको थियो। यसैगरी अविरल वर्षाका कारण दुईजना घाइते भएका छन्।
प्रहरीका अनुसार पहिराका कारण जिल्लामा १४ वटा घर पूर्ण क्षति र नौ वटामा आंशिक क्षति पुगेको छ। पहिराका कारण एकवटा चौपाया मरेका र चार वटा घाइते भएको जिल्ला प्रहरी कार्यालयका प्रवक्ता एवं प्रहरी नायब उपरीक्षक वसन्तकुमार शर्माले जानकारी दिए।
यस्तै वर्षाका कारण पाँचवटा चौपायाको मरेका, दुईवटा घाइते तथा एक हजार नौ सय २० वटा पंक्षी मरेका पनि शर्माले जानकारी दिए। विपद्बाट जिल्लामा अन्दाजी चार करोड आठ लाख ८१ हजारभन्दा बढीको सम्पत्तिमा क्षति भएको छ।
