![पपुवा न्युगिनी झडपमा २६ जनाको हत्या](https://himalpress.com/wp-content/uploads/2024/07/national-copy-copy.jpg)
सिड्नी (रासस/सिन्ह्वा)- पपुवा न्यू गिनीको पूर्वी सेपिक प्रान्तमा भएको झडपमा महिला र बालबालिकासहित कम्तीमा २६ जनाको सामूहिक हत्या भएको स्थानीय सञ्चारमाध्यमले बुधबार जनाएका छन्।
समाचार संस्था, नेसनलका अनुसार प्रान्तको अंगोरम क्षेत्रको सेपिक नदी किनारमा रहेका तामारा, ताम्बरी र अग्रुमारा गाउँहरूमा झडप भएको हो। त्यहाँ हत्या, बलात्कार र धनजनको क्षति भएको बताइएको छ। ३० जनाभन्दा बढी स्थानीय युवाहरूलाई उक्त घटनाको दोषी ठहराइएको नेसनलले जनाएको छ ।
सो झडप भूमि विवादसँग सम्बन्धित रहेको अंगोरमका सांसद सालियो वाइपोले जानकारी दिएका छन्। वाइपोले ३३ जना संदिग्ध आक्रमणकरीहरूको पहिचान गरिएको र अनुसन्धानका लागि प्रहरी टोली तैनाथ गरिएको बताए।
पपुवा न्युगिनीको उत्तरपूर्वी तटमा अवस्थित ४३ हजार वर्ग किलोमिटरमा फैलिएको पूर्वी सेपिक प्रान्तको अनुमानित जनसङ्ख्या चार लाख ३३ हजार ४८१ रहेको छ।