हिमाल प्रेस 
काठमाडौँ- श्रीलंकामा जारी एसीसी महिला एसिया कप क्रिकेटमा नेपालले पाकिस्तानलाई १०९ रनको लक्ष्य दिएको छ। श्रीलंकाको डम्बुला मैदानमा भएको खेलमा नेपालले निर्धारित २० ओभर खेल्दै ६ विकेटको क्षतिमा १०८ रन बनाएको हो।
नेपालका लागि कविता जोशीले ३१, सीता रानामगरले २६, पूजा महतोले २५ र कविता कुँवरले १३ रन बनाएका थिए। पाकिस्तानका लागि सादिया इक्बालले २ र फातिमा सानाले १ विकेट लिएका थिए।
पाकिस्तानले टस जितेर फिल्डिङ गर्ने निर्णय गरेको थियो।
नेपालले प्रतियोगिताको उद्घाटन खेलमा चिरपरिचत प्रतिस्पर्धी संयुक्त अरब इमिरेट्स (यूएई)लाई ६ विकेटले हराउँदै एसिया कपमा पहिलो ऐतिहासिक जित निकालेको थियो।
प्रतियोगितामा आठ टोली सहभागी छन्। दुई समूहमा विभाजन गरिएको प्रतियोगितामा नेपाल समूह ‘ए’ मा छ। नेपालको समूहमा भारत र पाकिस्तान जस्ता टेस्ट राष्ट्रसँगै यूएई छ।
त्यस्तै समूह ‘बी’ मा श्रीलंका, बंगलादेश, मलेसिया र थाइल्यान्ड छन् ।
