हिमाल प्रेस 
काठमाडौँ– काठमाडौँ महानगरपालिका वडा-८ का विभिन्न सात स्थानमा साप्ताहिक सांस्कृतिक कार्यक्रम सम्पन्न भएको छ। काठमाडौँ महानगरपालिकाको स्वर्णिम योजना, सांस्कृतिक महानगरअन्तर्गत काठमाडौँ महानगरपालिकाले विभिन्न सात वटा वडामा यस कार्यक्रमलाई साप्ताहिक सांस्कृतिक कार्यक्रमअन्तर्गत अगाडि बढाएको छ।
सोही कार्यक्रमअन्तर्गत काठमाडौँ महानगरपालिका-८ को पशुपति भुवनेश्वरी डवली, इँट्टापाखा, दथु टोल, जयबागेश्वरी परिसर, नवाली टोल, तिलगंगा तथा पशुपति परिसरमा रहेको घ्याम्पे सत्तलमा कार्यक्रम सम्पन्न भएको काठमाडौँ महानगरपालिका सम्पदा तथा पर्यटन समिति संयोजक एवं कामपा-८ का वडाध्यक्ष आशामान संगतले बताए। उनले विशेष गरी डबली तथा पाटीमा कलाकारले प्रस्तुति दिएको बताए।
काठमाडौँ महानगरपालिका कला, भाषा, जात्रा, पर्व, मेला, अमूर्त सम्पदाको सङ्ग्रहालय रहेको बताउँदै उनले धार्मिक सहिष्णुता र उच्च सामाजिक मानव सम्बन्ध रहेकाले विभिन्न चाड पर्व, जातजाति, रितिरिवाज र चालचलनको विविधताभित्र एकता रहेको उल्लेख गरे।
उनले कला, संस्कृतिको जीवन्त इतिहास तथा प्राचीन विशिष्ट शैलीको निर्माणका कारण विश्वकै दर्शनीय स्थलमध्येको एक सहरका रूपमा काठमाडौँ परिचित रहेको पनि बताए। लोक संस्कृति एवं परम्परागत बाजागाजाको महत्त्वलाई अंगीकार गर्दै यस किसिमका कार्यक्रमको आयोजना हुनु आफैँमा महत्त्वपूर्ण भएको अध्यक्ष संगतले बताए।
उनले विशेष गरी सम्पदा तथा पर्यटन विभागको तदारूकतामा बाजा गाजाको संरक्षणार्थ विभिन्न कार्यक्रमहरू भइरहेको बताउँदै सांस्कृतिक कार्यक्रममा धिमे बाजा, बाँसुरी, नाय्खीं, धाः धिमे, पछिमा, खिं, मादल, नाय खिं, भुस्या, ताः चिम्ता बबुचा छुस्यालगायतका बाजा समेटेर कार्यक्रम प्रस्तुत गरिएको बताए।
सांस्कृतिक कार्यक्रममा मंगलधुन, सयथरी बाजा, येला लुवया, सितला, जिगु थो मन, झांगद, धाः बाजा, पशुपतिनाथ, लाखे, म्युजिक कम्पोजिसन, ल्यामम दाजु मिक्स कम्पोजिसन लगायतका धुनहरू प्रस्तुति गरिएको थियो।
कार्यक्रममा स्थानीय कलाकारको प्रस्तुति रहेको थियो। जसमा कलाकारहरू नेवारी पहिरनमा प्रस्तुत भएका थिए। करिब ७५ जना कलाकारले सामूहिकरूपमा प्रस्तुत गरेको कार्यक्रममा सबै कलाकारहरू आ(आफ्नो मौलिक परम्परागत रूपमा सजिएका थिए।
