हिमाल प्रेस 
काठमाडौँ- इङ्ल्यान्डसँग ओमान १९ बलमै पराजित भएको छ। शुक्रबार बिहान एन्टिगुवाको सर भिभियन रिचर्ड्स रंगशालामा टस जितेर पहिला बलिङ गरेको इङ्ल्यान्डले उत्कृष्ट प्रदर्शनसँगै आईसीसी टी-२० विश्वकपमा ओमानलाई १९ बलमै पराजित गरेको हो।
इङ्ल्यान्ड ८ विकेटले विजयी भयाे। ओमानले दिएको ४८ रनको लक्ष्य पछ्याएको इङ्ल्यान्डले ३.१ ओभरमा २ विकेटको क्षतिमा ५० रन बनायो। कप्तान जोस बटलरले २४ रन बनाए। उनी अविजित रहँदै ८ बलमा ४ चौका र एक छक्का प्रहार गरे। फिल साल्ट १२ र विल ज्याक्स पाँच रनमा आउट हुँदा जोनी बेयरस्टो ८ रनमा अविजित रहे।
ओमानका बिलाल खान र कलीमउल्लाहले समान एक विकेट लिए। ओमानका १० ब्याट्सम्यानले दोहोरो अंक पनि पार गर्न सकेनन्। इङ्ल्यान्डका स्पिनर आदिल रसिदले सर्वाधिक चार विकेट लिए। मार्क वुड र जोफ्रा आर्चरले समान तीन विकेट लिए।
जितसँगै तीन खेलमा तीन अंक जोडेको इङ्ल्यान्डको पनि सुपर ८ मा पुग्ने सम्भावना बढेको छ। इङ्ल्यान्डले समूह चरणको अन्तिम खेल शनिबार नामिबियासँग खेल्ने छ।
समूह बी बाट दुई अंक जोडेको एशाेसिएट राष्ट्र नामिबिया र अंकविहीन रहेको ओमान प्रतियोगिताबाट बाहिरिसकेका छन्। ओमानले चार खेलमा कुनै पनि जितेन।
