हिमाल प्रेस 
काठमाडौँ- नेपाली फिल्ममा अभिनेत्रीको भूमिका प्रायः अभिनेता केन्द्रीत हुनेगर्छ। अर्थात् उनीहरू अभिनेताको जोडी बनेर मात्र पर्दामा देखिने गरेका छन्। केही फिल्ममा मात्र कथालाई ‘लिड’ गर्ने कार्यभार अभिनेत्रीले पाएका छन्। किनकी धेरै निर्देशक आफ्नो कथाको मुख्य पात्र ‘हिरो’ अभिनेतालाई नै बनाउने गर्छन्। तर, यसलाई तोड्ने पछिल्लो एक चलचित्र हो, ‘बोक्सीको घर’। यसमा प्रायः कलाकार महिला छन्।
केकी अधिकारीले निर्माण गरेको फिल्ममा चिनिने अनुहार उनीमात्र छिन्। यद्यपि फिल्मले व्यावसायिक रुपमा सफलता प्राप्त गरिरहेको छ। निर्माण पक्षले उपलब्ध गराएको तथ्याङ्कअनुसार शुक्रबारदेखि सोमबारसम्म चलचित्रको व्यापार रू तीन करोड २४ लाख भइसकेको छ। चलचित्रले चार दिनमै लगानी सुरक्षित गरेर घरेलु बजारमै मुनाफा प्राप्त गरिसकेको छ।
यो सफलताले केन्द्रीय भूमिकामा महिला कलाकारलाई राखेर चलचित्र निर्माण गर्न अन्य निर्मातालाई हौसला मिलेको छ। अभिनेत्री अधिकारीले कथा मन परेकै कारण यो फिल्म निर्माण गरेकी थिइन्।
‘सोही शीर्षकको नाटक हेरेपछि मैले फिल्म बनाएर धेरै दर्शकलाई देखाउने निर्णय लिएर आँट गरेकी हुँ। सुरुवाती समयमा हिरो (अभिनेता) को हो भनेर नसोधिएको होइन, तर अहिले भइरहेको व्यापारले यसपछिका फिल्ममा अभिनेत्रीलाई मुख्य भूमिका दिन प्रेरणा मिल्ने छ’, अधिकारीले भनिन्। उनले आफूलाई प्राप्त हुने अधिकांश भूमिका अभिनेताकै वरपर रहने किसिमको भएकाले ‘बोक्सीको घर’ जस्ता फिल्ममा लगानी गरेको बताइन्।
अभिनेत्री अधिकारी झैँ फिल्म ‘मनसरा’ मा शीर्ष भूमिकामा अभिनेत्री मिरुना मगर छिन्। स-साना भूमिकामार्फत चलचित्रमा अभिनयको सुरुवात गरेकी अभिनेत्री मगर अब अभिनेताको वरिपरी घुम्ने पात्रमा आफूलाई प्रस्तुत नगर्ने सोचाइमा रहेको बताउँछिन्।
‘आफ्नो पात्रले पार्ने प्रभाव हेरेर म फिल्म स्वीकार गर्ने कि नगर्ने निर्णय लिन्छु। शीर्ष भूमिकामा आफैँ हुँदा केही दायित्व बढेको महसुस भने हुनेरहेछ’, अभिनेत्री मगरले भनिन् ‘आगामी समयमा प्रभावहीन भूमिका गर्दिन। किनकि अब अभिनेत्रीलाई अभिनेताकै लागि राख्ने पद्धतिको अन्त्य हुनुपर्छ।’
अभिनेत्री वर्षा राउतले अभिनेत्रीलाई निर्माता तथा निर्देशकले उपयोग गर्न नसकेको विश्लेषण गरिन्। उनी पनि फरक भूमिकाकै पर्खाइमा छिन्। उनले भनिन् ‘हामीले निरन्तर काम गरेनौँ भने हराइने डर हुन्छ। त्यसैले अभिनेत्रीलाई धेरै समय पर्खिने समय छैन। यद्यपि हामीलाई शीर्ष भूमिकामा लिन अहिले पनि निर्माता तथा निर्देशकले बजारको कारण देखाउने गरेका छन्।’
निर्देशक पुर्नेन्दु झाले नेपालसहित भारतमा बन्ने फिल्ममा शीर्ष पात्रको रुपमा अभिनेतालाई हेर्न बानी परेको बताए। ‘अहिले आइरहेका फिल्मले विस्तारै अभिनेताको विषयमा स्थापित भाष्यलाई तोड्नेमा विश्वस्त छु’, निर्देशक झाले भने, ‘यद्यपि अहिलेको सन्दर्भमा बजारले पनि निर्देशकलाई केही कठिनाई दिएको छ। हामीलाई निर्माताको लगानी सुरक्षित गराउने दायित्व पनि हुन्छ, त्यसैले सबैको सल्लाहमा काम गर्नुपर्ने हुन्छ।’
पछिल्लो समय बनिरहेका केही फिल्मले अभिनेत्रीलाई पनि शीर्ष भूमिकामार्फत प्रस्तुत गरेको छ। यसको व्यावसायिक सफलताले आगामी दिनमा फिल्ममा अभिनेत्रीको उपस्थितिलाई निर्देश गर्नेछ। रासस
