हिमाल प्रेस 
काठमाडौँ- नेपालले त्रिदेशीय टी-२० आई शृंखलाको फाइनलमा आज नेदरल्यान्ड्ससँग खेल्दैछ।
खेल बिहान साढे ११ बजे टीयु क्रिकेट मैदानमा सुरु हुनेछ। नेपालको कप्तानी रोहित पौडेल र नेदरल्यान्ड्सको स्कट एडवार्ड्सले गर्नेछन्।
नेपाल घरेलु मैदानमा लगातार तेस्रो पटक त्रिदेशीय टी २० आई शृंखलाको उपाधि जित्न चाहन्छ।
यस शृंखलामा नेदरल्यान्ड्स ४ खेलमा ५ अंकका साथ शीर्षस्थानमा रहेर फाइनल खेलेको हो। नेपाल ४ खेलमा ४ अंकका साथ दोस्रो स्थानमा रहेर फाइनल खेलेको हो।
नामिबिया ३ अंकका साथ पुछारमा रहेर बाहिरिएको थियो।
नेपाल नामिबियासँग २० रन र नेदरल्यान्ड्ससँग २ रनले पराजित भएको थियो। त्यसपछि खेलमा पुनरागमन गर्दै नेपालले नामिबियालाई तीन रन र नेदरल्यान्ड्सलाई ६ विकेटले हराउँदै फाइनल यात्रा पक्का गरेको हो। पछिल्लो खेलमा नेपालले नेदरल्यान्ड्सलाई १२० रनमा अल आउट गरेको थियो।
