हिउँमा खेल्दै पढ्दै मनाङका विद्यार्थी

मनाङ- मनाङमा हिउँद लागेसँगै बिदा भएका विद्यालय खुल्न थालेका छन्। जाडो बढेसँगै बन्द भएका मनाङका विद्यालय फागुनदेखि खुल्न थालेको शिक्षा तथा समन्वय एकाई मनाङले जनाएको छ। विद्यालय खुलेसँगै हिमपात भएपछि विद्यार्थी हिउँसँगै पढ्दै आएको शिक्षा तथा समन्वय एकाई मनाङका प्रमुख मतिलाल चपाईंले बताए।

उनका अनुसार विशेष गरी माध्यमिक शिक्षा परीक्षा (एसईई) लाई मध्यनजर गरी मनाङका तीन विद्यालय खुलिसकेका छन्। उनले भने,‘एसईईका लागि विद्यालय खुलाइसकेका छौँ। बिदा लम्बिँदा विद्यार्थीलाई समस्या हुन्छ। यसलाई मध्यनजर गरेका छौँ।’

उनले नासो गाउँपालिका–५ थोंचेस्थित प्रकाशज्योति आवासीय माध्यमिक विद्यालय फागुन १ गतेदेखि खुलेको जानकारी दिए। चामे गाउँपालिका–१ तिमाङस्थित गौरीशंकर माध्यमिक विद्यालय माघ २३ देखि र चामे–४ चामेस्थित लोकप्रिय माध्यमिक विद्यालय माघ २८ गतेदेखि पठनपाठन सुरु भएको उनको भनाइ छ।

यस वर्ष मनाङबाट प्रकाशज्योतिका १९, लोकप्रियका १७, अन्नपूर्ण माविका एक र लोकप्रिय माविबाट (खुला) तीन गरी ४० विद्यार्थी एसईई परीक्षामा सहभागी हुने प्रमुख चपाईंले बताए। मनाङमा चारवटा मात्रै माध्यमिक विद्यालय छन्।

यस वर्षको एसईई परीक्षालाई मध्यनजर गरी जाडो भए पनि विद्यालय छिटो खुलाइएको प्रकाशज्योति माविका प्रधानाध्यापक पद्मराज पन्थीले बताए। उनले भने,‘एसईई परीक्षा दिने विद्यार्थीको पठनपाठनलाई लक्षित गरी विद्यालय चाँडै खुलाएका हौँ। चिसो भए पनि विद्यार्थीलाई पठनपाठनमा प्रभाव पर्नसक्ने विषयलाई मध्यनजर गरेका छौँ।’ जाडो बिदाका समयमा पनि लमजुङको च्याम्चेमा विद्यार्थीको घरमै पठनपाठन गराइएको उनले बताए।

प्रधानाध्यापक पन्थीले भने,‘आवासीय विद्यालय भएकाले लमजुङका बच्चा पनि मनाङमा पढ्न आउँछन्। मनाङको सिमानामै पर्ने च्याम्चेका केही विद्यार्थी हाम्रैमा पढ्छन्। जाडो बिदाका समयमा च्याम्चेमा घर खोजेर पढायौँ। एसईई परीक्षालाई विशेषरूपमा लिइने हुँदा हामी पनि लागिरहेका छौँ। विद्यार्थी उत्कृष्ट र सहभागी सबै विद्यार्थी उत्तीर्ण हुँदा हाम्रो गौरव बढ्नेछ।’

वार्षिक परीक्षा पनि आइसकेको र पठनपाठनमा लाग्नुपर्ने भएकाले बिहान दुई घण्टा र बेलुका दुई घण्टा तालिका बनाएर विज्ञान, गणित, अंग्रेजी र ऐच्छिक गणित पढाउने गरेको प्रअ पन्थीले बताए। एसईईका विद्यार्थी पठनपाठनमा व्यस्त हुने र साना बालबालिका हिउँमा खेल्दै पढ्ने गरेको उनको भनाइ छ।

आवासीय विद्यालय भएकाले समय व्यवस्थापनमा समस्या नभएको उनले बताए। पालिकाले ५० लाख वार्षिक बजेट छुट्याएर विद्यालयलाई सहयोग गर्दै आइरहेको छ। आवासीय विद्यालय भएकाले प्रतिविद्यार्थी एक हजार पाँच सय मासिक शुल्क भने लिने गरेको उनले बताए। यसका अतिरिक्त १२ जना विद्यार्थीलाई निःशुल्क आवासीय सुविधा उपलब्ध गराएको विद्यालयले जनाएको छ। सञ्चालनमा नआएका विद्यालयका शिक्षकलाई काजमा ल्याएर पठनपाठन गरिरहेको पन्थीले जानकारी दिए।

मनाङका अन्य विद्यालय फागुन १५ पछि मात्रै खुल्नेछन् भने नार्पाभूमि गाउँपालिकाका विद्यार्थीको पठनपाठन काठमाडौँ सञ्चालन भइरहेको छ। वार्षिक परीक्षा सकाएर नतिजा प्रकाशन गरी नयाँ शैक्षिकसत्रका लागि वैशाखमा सञ्चालन गरिने नार्पाभूमि गाउँपालिकाका शिक्षा शाखा प्रमुख मनीषा विकले जानकारी दिइन्।

उनले भनिन्,‘एक त विकट छ। सदरमुकामबाटै जान दुई दिन लाग्छ। सडक सञ्जाल पुगेको छैन भने अर्कोतर्फ यहाँ अहिले बाक्लो हिउँ छ। चिसो अत्यधिक भएकाले गाउँ फर्किने अवस्था छैन। त्यसैले यहीँ चालु शैक्षिकसत्र सकाएर मात्रै फर्कन्छौँ। यसले विद्यार्थीलाई पनि सहज भएको छ।’

गौरीशंकर मावि कक्षा ७ मा अध्ययनरत विद्यार्थी छुपी गुरुङलाई हिउँसँग खेल्दै पढ्न पाउँदा खुसी लागेकोछ। उनले भनाइ छ,‘हिउँ परे पनि रमाइलो गरी खेल्दै पढ्न पाएका छौँ।’ मौसम चिसो भए पनि हिउँ खेल्दै पढ्न पाएको कक्षा ८ मा अध्ययनरत विवेक गुरुङले बताए। ढिलागरी परेको हिमपातले चिसो बढे पनि विद्यार्थी शिक्षाबाट प्रभावित हुन नदिने गरी विद्यालयमा पठनपाठन भने सञ्चालन गरिएको छ। रासस