हिमाल प्रेस 
काठमाडौँ- इलामको पशुपतिनगर भन्सार कार्यालयले आर्थिक वर्ष २०८०/८१ को पुससम्ममा १ करोड ३४ लाख १३ हजार राजस्व संकलन गरेको छ । यो लक्ष्यको ६९ दशमलव ९६ प्रतिशत हो।
आव २०८०/८१ मा भन्सारले १ करोड ९१ लाख ७१ हजार राजस्व संकलनको लक्ष्य लिएको थियो। आव २०७७/७८ मा १ करोड ८९ लाख ९९ हजार राजस्व संकलन गर्ने लक्ष्य लिएको पशुपतिनगर भन्सारले १ करोड २ हजार राजस्व संकलन गरेको कार्यालय प्रमुख प्रवीन सुब्बाले जानकारी दिए।
आव २०७८/७९ मा २ करोड ५३ लाख ४० हजार राजस्व संकलन गर्ने लक्ष्य लिएकोमा ८७ लाख ३८ हजार (३४ दशमलव ४८ प्रतिशत) राजस्व संकलन भएको थियो। सुब्बाका अनुसार, २०७९/८० मा २ करोड ५० लाख ८५ हजार राजस्व संकलन गर्ने लक्ष्य लिएकोमा २ करोड ७१ लाख ८२ हजार (१० प्रतिशत) राजस्व संकलन गरिएको छ।
कार्यालयका नायब सुब्बा विनोद आचार्यले अवैध कारोबारअन्तर्गत बरामद भएको सामग्री लिलामीबाट सबैभन्दा बढी राजस्व संकलन भएको बताए। पशुपतिनगर भन्सारअन्तर्गत ८ वटा छोटी भन्सार कार्यालय रहे पनि सबै छोटी भन्सार कार्यालय यसअघि नै बन्द भइसकेका छन् ।
‘हरियो तरकारी, छुर्पी, दूध, चिया, घ्यू चिज, गमला, लत्ताकपडा र जुत्ता चप्पल भारत निर्यात हुँदै आएको पशुपतिनगर नाकाबाट भन्सार कार्यालय लक्ष्यअनुसार राजस्व संकलन गर्न थालेको छ,’ आचार्यले भने।
कार्यक्रममा सूर्योदय उद्योग वाणिज्य संघका अध्यक्ष प्रमोद राईले नेपालतर्फ भन्सार भए पनि भारतमा भन्सार कार्यालय नहुँदा समस्या हुँदै आएको बताए। भारततर्फ भन्सार नहुँदा बिल इन्ट्री नहुने समस्याका कारण आयात निर्यातमा समस्या हुँदै आएको अध्यक्ष राईले जानकारी दिए । उक्त अवसरमा भारतीय सुरक्षा निकायका अधिकारी अजय कौशीकले भारततर्फ भन्सार, क्वारेन्टाइन लगायतका कार्यालय स्थापना गर्न भौगोलिक समस्या रहेको बताए।
इलामका प्रमुख जिल्ला अधिकारी इन्द्रदेव यादवले दुवै देशले सीमा क्षेत्रमा आवश्यक कार्यालय स्थापना गरेर आयात निर्यात सहज बनाउनुपर्ने बताए। उनले भौगोलिक विकटताका कारण कार्यालय स्थापना गर्न सकिएन भन्ने भारतको भनाइमा सत्यता नरहेको बताए। कार्यालय प्रमुख सुब्बाले खुला सीमानाका भएका कारण चोरी पैठारी रोकिन नसकेको बताए।
कार्यक्रममा सबैभन्दा बढी कारोबार गर्ने सूर्योदय–२ पशुपतिनगरका दादिकी शेर्पालाई सम्मान गरिएको थियो । उक्त अवसरमा कार्यालयका नायब सुब्बाद्वय विनोद आचार्य र प्रकाश सुन्दासलाई उत्कृष्ट कर्मचारीका रूपमा सम्मान गरिएको थियो। भन्सार दिवसको उपलक्ष्यमा पहिलो सेवाग्राहीका रूपमा भारतको दार्जिलिङका दावानर्बु शेर्पालाई सम्मान गरेको नायब सुब्बा आचार्यले जानकारी दिए।
कार्यक्रममा सशस्त्र प्रहरी बल प्रस्तावित गुल्म पशुपतिनगर र एलाका प्रहरी कार्यालय पशुपतिनगरलाई राजस्व संकलनमा सहयोग गरेको भन्दै कदरपत्र प्रदान गरिएको छ। ७२औं अन्तर्राष्ट्रिय भन्सार दिवसको अवसर पारेर शुक्रबार आयोजना गरिएको कार्यक्रममा कार्यालयले अर्थवार्षिक नतिजासहित ३ वर्षको प्रगति सार्वजनिक गरेको छ।
