हिमाल प्रेस 
म्याग्दी– म्याग्दीको मालिका गाउँपालिका-७ बिममा शनिबार दिउँसो भएको घटनामा ज्यान गुमाउनेको संख्या दुई पुगेको छ। धारिलो ढुंगा प्रहार हुँदा गम्भीर घाइते भएकी मालिका-७ बिमकी सात वर्षीया प्रियंका गर्बुजाको पोखराको मणिपाल शिक्षण अस्पतालमा उपचारका क्रममा अपराह्न मृत्यु भएको म्याग्दीका प्रहरी नायब उपरीक्षक मदन कुँवरले बताए।
‘प्रियंकाकी हजुरआमा ७० वर्षीया मनीषा गर्बुजाको मालिका-७ को लुरवाङस्थित घटनास्थलमै ज्यान गएको थियो’, उनले भने, ‘हेलिकोप्टरबाट पोखरा लगिएकी प्रियंकालाई पनि चिकित्सकले मृत घोषणा गरेका छन्।’ चिर्पट प्रहार हुँदा घाइते भएकी ६६ वर्षीया अमृता जुग्जालीको पोखराको मणिपाल शिक्षण अस्पतालमा उपचार भइरहेको छ। चिकित्सकले जुग्जाली खतरामुक्त भएको बताएका छन्।
हजुरआमालाई दरवाङ-मराङ सडकमा रगताम्मे देखेपछि बचाउन गएकी प्रियंकाको टाउकोमा प्रहार भएको थियो। प्रियंका भाइ प्रिन्स भने घरको खाटमुनि लुकेर ज्यान बचाएका थिए। मनीषाका छोरा र बुहारी खेतमा काम गर्न गएका समयमा घटना भएको थियो।
लुरवाङको माथि जंगलमा घाँस काट्दै गरेका अमृता र अर्का एक जना महिलामाथि पनि चिर्पट प्रहार भएको थियो। प्रतिकार गर्ने क्रममा अमृता घाइते भएकी हुन्। बिम तल्लो गाउँ नजिकै एक ट्याक्सी पनि तोडफोड भएको स्थानीयले बताएका छन्।
हत्या र आक्रमणमा संलग्न भएको आरोपमा मालिका-७ बिमवाङबाट स्थानीयले एक जना मानसिक सन्तुलन ठिक नभएका व्यक्तिलाई नियन्त्रणमा लिएर प्रहरीमा बुझाएका थिए। ‘एक जना शङ्कास्पद व्यक्तिलाई नियन्त्रणमा लिएका छौँ’, प्रनाउ कुँवरले भने, ‘विस्तृत अध्ययन र अनुसन्धानका क्रममा रहेकाले पक्राउ परेका व्यक्तिको नाम गोप्य राखिएको छ। आइतबार तथ्यसहित सबै विवरण र ती व्यक्तिलाई सार्वजनिक गर्छौँ।’ मृतकको शव परीक्षणका लागि बेनी अस्पतालमा लगिएको छ। रासस
