हिमाल प्रेस 
बारा- रौतहटस्थित गौर कारागारमा क्षमताभन्दा दोब्बर कैदी राखिएको छ। जीर्ण भवनमा क्षमताभन्दा बढी राखिएपछि कैदीबन्दी त्रासमा बस्नुपरेको छ। साथै दैनिक क्रियाकलापमा समेत सास्ती भोग्न बाध्य भएको उनीहरूले बताएका छन्।
सन् १९९० मा गौर नगरपालिका–८ मा निर्माण गरिएको उक्त कारागार जीर्ण हुँदा पनि जोखिम मोलेर कैदीबन्दी राखिएका छन्। अधिकतम २ सय र न्यूनतम १ सय ६० क्षमता भएको उक्त कारागारमा अहिले महिला, पुरुष र बालबालिका गरी ३ सय ८१ कैदीबनदी रहेका कारागार प्रमुख मणिभूषण शाहले जानकारी दिए।
उनका अनुसार १ सय ८९ पुरुष, १४ महिला कैदीबन्दी कारागारमा छन्। थुनुवामा १ सय ७१ पुरुष, ४ महिला, २ बालबालिका गरी जम्मा ३ सय ८१ कैदीबन्दी रहेका छन्। कारागारको छत माथि जस्तापाताले छाएको टहरा निर्माण गरी ७६ कैदीबन्दीलाई राखिएको प्रमुख शाहले जानकारी दिए।
उनका अनुसार कारागारमा किचन, बरन्डा, भर्याङमा समेत कैदीबन्दी राखिएको छ। शौचालय जानेदेखि नुहाउनसमेत कठिन हुने गरेको भेटघाटका क्रममा रहेका कर्तव्य ज्यान मुद्दाका कैदी महताव आलमले बताए। ‘कर्तव्य ज्यान मुद्दाका एक महिला जो सात महिनाको गर्भवती हुनुहुन्छ उहाँलाई झनै कठिनाइको सामना गर्नुपरेको छ,’ कर्तव्य ज्यान मुद्दाका कैदी विष्णु रायले भने।
ठाउँ अभावका कारण राति सुत्न निकै समस्या हुने गरेको उनीहरूको गुनासो छ। दिनमा जसोतसो समय कटिन्छ तर रातमा समय काट्न निकै अप्ठ्यारो सामना गर्नुपर्ने चौकीदार मनोजकुमार बैठाले सुनाए।
जुनसुकैबेला जीर्ण भवन भत्किने सम्भावना रहेकाले त्रासमा रात बिताउने गरेको उनको भनाइ थियो। ‘भवन निकै पुरानो भएकाले बर्खायाममा चुहिने, गर्मीयाममा गर्मीले बसिनसक्नुजस्ता समस्याका गुनासो पटकपटक कैदीबन्दीले मलाई भन्ने गरेका छन्,’ कारागार प्रमुख शाहले भने, ‘हामीले माथिल्लो निकायमा उनीहरूको पीडाका बारेमा जानकारी गराएका छौँ।’
कारागारको चारैतिर पर्खाल जीर्ण भएको, ठाउँठाउँमा चर्कोको, बांगो भएकाले भवन भत्कने सम्भावना उत्तिकै रहेको भन्दै तत्कल पर्खालको मर्मतसम्भार गर्नुपर्ने आवश्यकता रहेकोमा उनले जोड दिए।
१० कट्ठा १० धुरमा निर्माण भएको कारागारको जग्गा पुर्जा रहे पनि दक्षिणतिर दुईदेखि तीनकट्ठा व्यक्तिले अतिक्रमण गरेको बताउँदै जेलर शाहले सुरक्षाको दृष्टिकोणले पनि गौर कारागार संवेदशील रहेको बताए।
पर्खाल ठूलो नहुनुले पनि जोखिमको समना गर्नुपर्ने उनको भनाइ थियो। ‘भेटघाट कक्ष र फोन गर्ने ठाउँ साँघुरो छ। ढल निकासाको उचित व्यवस्था नहुँदा समस्या भइरहेको छ। ढलको निकास, भेटघाट र फोन गर्ने ठाउँलाई फराकिलो पार्ने कामका लागि प्रयासरत रहे पनि बजेट अभावका कारण गर्न सकिएको छैन,’ जेलर शाहले भने।
सडकको सतह र जेलको कम्पाउन्डको उचाइ उस्तैउस्तै भएकाले कहिलेकाँही कैदीले हाम फालेर भाग्ने कोसिस समेत गर्ने गरेका उनले बताए।
बाँकेमा कारागार निर्माण भइसकेको, नुवाकोटमा निमार्णाधीन अवस्थामा रहेकाले ती कारागार निर्माण सम्पन्न भए पछि क्षमताभन्दा बढी कैदी रहेका ठाउँका कैदीलाई सारिने गृह मन्त्रालयका प्रवक्ता केदारनाथ शर्माले जानकारी दिए।
कतिपय ठाउँमा पुरानै भवनमा कैदी बसिरहे पनि पुनःनिर्माणको काम थालिएको उनले बताए। ‘आफूलाई सहज हुने ठाउँ कैदीले रोज्ने, बाहिर जान नमान्नेलगायत कारणले पनि गौर कारागारमा क्षमताभन्दा बढी कैदी राखिएको हो,’ प्रवक्ता शर्माले भने। रासस
