हिमाल प्रेस 
काठमाडौँ- नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानी गर्न चिनियाँ लगानीकर्तालाई आग्रह गरेका छन्। चीन साउथ एसिया बिजनेस फोरमले चीनको युनान प्रान्तमा आयोजना गरेको ‘चाइना (युनान) नेपाल इन्डस्ट्रियल कोअपरेसन प्रमोसन एन्ड इन्टरप्राइजेज’ बैठकमा सम्बोधन गर्दै ढकालले चिनियाँ लगानीकर्तालाई उक्त आग्रह गरेका हुन्।
नेपालको प्राकृतिक स्रोत, दक्ष जनशक्ति, बजार पहुँच र चीन तथा भारतसँगका सहुलियतपूर्ण व्यापार सम्झौताले नेपाल लगानीको गन्तव्यका रूपमा विकसित भएको ढकालको भनाइ थियो।
उनले युनान र नेपालको मिल्दोजुल्दो भौगोलिक अवस्था तथा जलस्रोतलगायत समान विशेषताका कारण पनि चिनियाँ लगानीकर्ताहरूका लागि नेपालमा लगानी सहज रहेको उल्लेख गरे।
उनले ऊर्जा, पर्यटन पूर्वाधार, यातायात, व्यापार सहजीकरण, साना तथा मझौला उद्योग, आईसीटी, कृषिलगायत क्षेत्रमा नेपालमा थप लगानीको अवसर रहेको बताए।
