हिमाल प्रेस 
इटहरी- धरानकाे चारकोसे जंगलमा गोली हानेर हत्याको आरोपमा दुई जनालाई प्रहरीले पक्राउ गरेको छ। यही साउन ५ गते विराटनगर महानगरपालिका-५ का रोहित चौधरीको गोली हानी हत्या गरेको आरोपमा प्रहरीले बुधबार दुई जनालाई पक्राउ गरेको हो।
पक्राउ पर्नेमा मोरङको लेटाङ नगरपालिका १ घर भएका ३५ वर्षीया दीपक तिम्सिना र धरान १४ का ३४ वर्षीय अनसन तामाङ छन्। उनीहरू दुवै लागूऔषध प्रयोगकर्ता रहेको कोशी प्रदेश प्रहरी कार्यालय विराटनगरका डीआईजी राजेशनाथ बास्तोलाले जानकारी दिए।
पक्राउ परेकाहरूलाई बुधबार नै सार्वजनिक गरिएको छ। तिम्सिना जबरजस्ती करणी मुद्दामा १० वर्ष र अनसन लागूऔषध मुद्दामा ६ महिना कारागार बसेर निस्किएका खुलेकाे छ। डीआईजी बास्तोलाकाअनुसार पक्राउ परेकाहरू चोरी र लुटपाटको घटनामा संलग्न छन्।
पक्राउ परेकाको साथबाट पेस्तोल, गोलीलगायत वस्तु बरामद भएको बास्तोलाले बताए। आफ्नो जन्मदिनको दिन साथीसँग घुम्नका लागि धनकुटाको मुलघाट पुगेर फर्कनेक्रममा रोहितमाथि चारकोसेस्थित सेउती खोलाको पुल नजिकै गोली प्रहार गरी हत्या गरिएको थियो।
