भक्तपुरको बाल सुधारगृहका बालबालिका भागे

काठमाडौँ- भक्तपुरमा रहेको बाल सुधार केन्द्रबाट करिब एक सय बढी जना बालबालिका भागेका छन्। सानो ठिमीस्थित युसेफको बाल सुधार गृहमा रहेका उनीहरू सोमबार दिउँसो ढोका फोरेर भागेको प्रहरीले जनाएको छ।

भक्तपुर प्रहरी परिसरका डीएसपी वसन्त पाठकका अनुसार सय बढी भागेको अनुमान गरिएको छ। भागेकामध्ये केहीलाई प्रहरीले नियन्त्रणमा लिइसकेको छ। अन्यको खोजी भइरहेको पाठकको भनाइ छ।

आइतबार सुधार गृहमा एक किशोरको मृत्यु भएपछि उनका आफन्तले गेटमा प्रदर्शन गरेका थिए। कमल बस्नेतको सुधार गृह भित्रै मृत्यु भएपछि आफन्तले विरोध गरिरहेका छन्। कुनै अपराध गरेको तर १८ वर्षभन्दा मुनिको भए त्यस्ता व्यक्तिलाई सजाय तोकिए बाल सुधार गृहमा राखिन्छ।