हिमाल प्रेस 
सांकेतिक तस्बिर।
कञ्चनपुर– जिल्ला प्रहरी कार्यालय कञ्चनपुरले अवैध रूपमा मेडिकल पसल सञ्चालन गर्ने १५ जनालाई पक्राउ गरेको छ।
अनधिकृत रूपमा मेडिकल पसल सञ्चालन गरेर उपचार गर्ने १५ जनालाई नियन्त्रणमा लिएर औषधिसम्बन्धी कसुरमा मुद्दा दर्ता गरिएको प्रहरी उपरीक्षक कमल थापाले जानकारी दिए।
‘वर्षौंदेखि अनधिकृत रूपमा सञ्चालनमा रहेका मेडिकल पसल बन्द गराउने अभियान थालेका छौं,’ उनले भने, ‘यस क्षेत्रमा बिना इजाजत जोखिमपूर्ण औषधिको बिक्री वितरण तथा उपचार भइरहेको पाइएको छ।’
औषधिसम्बन्धी कसुरमा मुद्दा दर्ता गरेर अवैधानिक रूपमा मेडिकल पसल सञ्चालन गर्नेलाई कानुनी दायरामा ल्याउने कार्य भइरहेको प्रहरी उपरीक्षक थापाले बताए।
जिल्ला प्रहरी कार्यालय कञ्चनपुरको तथ्यांकअनुसार १ महिनाको अवधिमा अवैध मेडिकल सञ्चालन गर्ने १५ जनालाई नियन्त्रणमा लिएर औषधि सम्बन्धी कसुर दर्ता भएको छ।
प्रहरीले शुक्रबार भीमदत्त नगरपालिका क्षेत्रका ६ मेडिकल पसलमा खनतलासी गरेको थियो।
ती मेडिकल पसलका चार सञ्चालकलाई नियन्त्रणमा लिएको प्रहरी उपरीक्षक थापाको भनाइ छ। पक्राउ पर्नेमा भीमदत्त नगरपालिका-७ की विमला उपाध्याय, भीमदत्त -१६ मझगाउँका राजेन्द्र चन्द, भीमदत्त-१० सुकासालका सुरेश पाण्डेय र सोही ठाउँका मोहन रोकाया छन्।
२ जना मेडिकल सञ्चालक भने फरार रहेको प्रहरीले जनाएको छ। भीमदत्त -१६ वसन्तपुरका वीरेन्द्रराज पन्त र भीमदत्त-१३ साझा चौराहका राम विष्ट फरार रहेका छन्।
पन्तको मेडिकल पसलबाट ९४ प्रकारका औषधि र विष्टको मेडिकल पसलबाट एक सय २५ प्रकारका औषधि बरामद गरिएको थियो।
यसअघि प्रहरीले दोधारा चाँदनी र भीमदत्त नगरपालिका क्षेत्रबाट ११ मेडिकल सञ्चालकलाई समातेको थियो। उनीहरुलाई औषधिसम्बन्धी कसुरमा जिल्ला अदालत कञ्चनपुरबाट धरौटीमा रिहा भएको प्रहरी उपरीक्षक थापाको भनाइ छ।
प्रहरीको खानतलासका क्रममा विना इजाजतका औषधि बिक्री वितरण गर्दै आएको, नाम बिनाको मेडिकल सञ्चालन गरेको, पसलमा कुनै बोर्ड नरहेको, इजाजत पत्र नराखेको र बिनासिफारिस बिक्री वितरण गर्न नपाइने जोखिमपूर्ण औषधि बिक्रीका लागि तयारी अवस्थामा राखेको पाइएको छ।
मुलुकी अपराध संहिता २०७४ को परिच्छेद १९ अनुसार कानुनबमोजिम औषधि बिक्री वितरण गर्न पाउने व्यक्तिले उपचार गर्न पाउने इजाजत प्राप्त व्यक्तिको बिनासिफारिस कसैलाई मानव शरीरमा गम्भीर असर हुने कुनै लागुऔषध, विषादी वा जोखिमपूर्ण औषधि बिक्री वितरण गर्न पाइँदैन।
