हिमाल प्रेस 
काठमाडौँ- नेपाल भ्रमणमा रहेका चिनियाँ खर्बपति ज्याक माले प्रधानमन्त्री पुष्पकमल दाहाल ‘प्रचण्ड’लाई भेट्ने इच्छा व्यक्त गरेका छन्। उनले भेट्ने समय मागेपछि प्रधानमन्त्री कार्यालयले परराष्ट्र मन्त्रालयसँग सोधेर भेट्ने जानकारी दिएको छ।
होटल द्वारिकाज्मा रहेका ज्याकले प्रधानमन्त्रीलाई भेट्ने समय माग गरेको प्रधानमन्त्री निकट स्रोतले जानकारी दिएको छ। उनले यहाँको कानुनअनुसार लगानी गर्छु भनेमा प्रधानमन्त्रीले मात्र होइन सारा नेपालीले स्वागत गर्नेछन् भन्दै भेट दिन उपयुक्त हुने सुझाव प्रधानमन्त्री सचिवालयको छ। यद्यपि परराष्ट्रबाट स्पष्ट नभएसम्म भेट नहुने सचिवालयले जनाएको छ।
परराष्ट्र मन्त्रालयले यो भेटबारे खासै जानकारी नभएको बताएको छ। ‘ज्याक नेपाल आएको जानकारी हामीले यहाँहरूको अनलाइन समाचार पढेर थाहा पायौँ, प्रधानमन्त्रीलाई भेट्ने विषय कहाँबाट जानकारी हुनु?,’ परराष्ट्रमन्त्री एनपी साउदले भने, ‘निजी भ्रमणमा आउनुभएको होला, भेट्ने समय माग भएको खण्डमा छलफल गरेर तय गर्न सकिन्छ। नेपालमा लगानीको वातावरण बुझ्न, यहाँ भएका साथीभाइ भेट्न आउनु भएको हुन सक्छ।’
ज्याक मा बंगलादेशको ढाका हुँदै विशेष विमानबाट काठमाडौँ अवतरण गरेका हुन्। उनी जापानबाट ढाका पुगेका थिए। चीनको ह्वाङझाउमा जन्मिएका ज्याक पहिला शिक्षण पेसामा थिए। उनले शिक्षण पेसा छाडेर सन् १९९९ मा अलिबाबा ग्रुप स्थापना गरेका थिए।
६० हजार डलरको अलिबाबा ग्रुप यतिबेला खर्ब डलरमाथिको बजार मूल्यमा छ। अलिबाबाले आरम्भमा साना तथा मझौला चिनियाँ व्यवसायीका लागि इन्टरनेट बजार उपलब्ध गराउने काम गरेको थियो। उक्त कम्पनीलाई अहिले चीनको अमेजन भनिन्छ।
सन् २०२० मा चिनियाँ सरकारको आलोचना गरेपछि उनी सार्वजनिक जीवनबाट बाहिर थिए। उनी पछि एकाएक जापानमा देखिए। अहिले पनि उनी जापानबाट ढाका हुँदै नेपाल आएका हुन्। चिनियाँ सरकारले सुरु गरेको प्रविधि क्षेत्रमाथिको नियमन प्रयासको आलोचना त्यतिबेला गरेपछि उनी हराएका थिए। उनीमाथि अनेकन् अड्कलबाजी भएको थियो।
ज्याक यतिबेला व्यवसायसँगै प्रेरणादायी मन्तव्य दिने उद्यमीको रूपमा परिचित छन्। उनी युवाहरूलाई प्रवचन दिने काम गरिरहेका हुन्छन्। उनै ज्याकले नेपालमा पनि सम्भावना देखेर आएको हुन सक्छ। उनले नेपालमा रहँदा प्रधानमन्त्री भेट्नु र नयाँ स्थान घुम्नु स्वाभाविक हो।
उनी नेपालमा रहँदा चितवन जाने कार्यक्रम बनेको छ। उनले अर्थमन्त्री डा. प्रकाशशरण महत, नेपाली डलर अर्बपति एवं नेपाली कांग्रेसका सांसद् विनोद चौधरी र उनका छोरा निर्वाण चौधरीलाई भेट्ने कार्यक्रम छ। चौधरीको सम्बन्ध ज्याकसँग राम्रै छ। तर पनि भेटवार्ताबारे स्पष्ट जानकारी बाहिर आएको छैन।
उनलाई मंगलबारनै नेपालका लागि चिनियाँ राजदूत छेन सोङले पनि भेट्दैछन्। उनी नेपाल आएको बारेमा आफूले पनि समाचार पढेर जानकारी पाएको चिनियाँ दूतावासका एक अधिकारीले बताए। निजी भ्रमण भएकाले त्यसबारेमा आफूहरू जानकार नभएको ती अधिकारीको भनाइ छ।
ज्याक बिहीबारसम्म नेपालमा रहनेछन्। उनी बिहीबारनै पाकिस्तानको लाहोर प्रस्थान गर्ने विमानस्थलका एक अधिकारीले जानकारी दिए।
