हिमाल प्रेस 
काठमाडौँ- अनलाइन जुवा खेलाएको आरोपमा प्रहरीले चार जनालाई पक्राउ गरेको छ। काठमाडौँ उपत्यकाका विभिन्न ठाउँमा बसोबास गर्ने राजा चौधरी समेतका व्यक्तिहरूले वान एक्स बेटबाहेक अन्य विभिन्न अनलाइन क्यासिनो गेम (जुवा)हरूमा बाजी राख्दा जितिन्छ भन्ने विश्वास दिलाएर सट्टेबाजी गराएको पाइएपछि पक्राउ गरिएको हो।
पक्राउ पर्नेमा बारा जितपुर सिमरा घर भई काठमाडौँ कलंकी बस्ने २४ वर्षीय राजा चौधरी, सोही ठाउँका विवेक चौधरी, ठमेल बस्ने रितेन्द्र प्रधान र नवलपरासी त्रिवेणी सुस्ता गाउँपालिका घर भई काठमाडौँको ठमेल बस्ने आशा गुरुङ रहेको प्रहरीले जनाएको छ।
गोप्य सूचनाका आधारमा प्रहरीले निगरानी गरिरहेको थियो। उनीहरूलाई कलंकी, ठमेल र बालाजु हाइटलगायत क्षेत्रबाट पक्राउ गरिएको हो। थप कारबाहीका लागि जिल्ला प्रहरी परिसरमा बुझाइएको काठमाडौँ उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीले जानकारी दिए।
अनुसन्धानका क्रममा उनीहरूले मोबाइलमा विभिन्न जुवा खेलाउने अनलाइन प्लेटफर्मको प्रयोग गरेर सट्टेबाजी गराउने गरेको खुलेको छ।
