हिमाल प्रेस 
नारायणगढ-मुग्लिन सडक। फाइल तस्बिर।
चितवन– नारायणगढ- मुग्लिन सडकअन्तर्गत सेती दोभानको पुल सञ्चालनमा आएको छ। निर्माणाधीन १५ पुलमध्ये सेती दोभानको पुल सञ्चालन गरिएको हो।
६५ मिटर लामो उक्त पुल सञ्चालनमा आएसँगै नारायणगढ-मुग्लिन सडकको दूरी १ सय मिटर कम भएको छ। निर्माण सुरु भएको २ वर्षपछि पुल सञ्चालनमा आएको नागढुंगा-मुग्लिन सडक आयोजना पश्चिम खण्ड (नारायणगढ-मुग्लिन) का प्रमुख किरण कार्कीले जानकारी दिए।
पुल निर्माणसँगै सेती दोभानमा घुमाउरो बाटोका कारण सवारी साधन विस्तारै चलाउनुपर्ने बाध्यता हटेको छ। यो महिनाभित्र लामो बालुवा, डुम्रे, रिग्दी र सिमलताल पुल पनि सञ्चालनमा आउने उनको भनाइ छ।
पुलको फिनिसिङको काममात्र बाँकी रहेको उनले जनाए।
१ अर्ब २७ करोडमा तीन वर्षअघि १५ पुल निर्माण सुरु गरिएको थियो। ३ वर्षका लागि दुई प्याकेज बनाएर ठेक्का लगाइएको थियो। कार्कीका अनुसार पुल निर्माणका लागि अनक कन्स्ट्रक्सनलाई थप गरेको एक वर्षको समय यही वर्ष पुस मसान्तमा सकिँदै छ।
निर्धारित समयमा काम नसकिएपछि १ वर्ष समय थप गरिएको थियो। विश्व बैंकको सहयोगमा सडकखण्डका पुल निर्माण गरिएको हो।
निर्माणाधीन अन्य आठ पुल दसैँ र तिहारको आसपासमा सञ्चालनमा ल्याउने आयोजनाले जनाएको छ। ती सबै पुलको ढलान भइसकेको कार्कीले जानकारी दिए। मुग्लिननजिकै खहरे खोला पुल र तुइन खोला पुलको भने धेरै काम बाँकी छ।
तुइन खोलामा पहाड फोर्न विस्फोट नै गराउनुपर्ने भएकाले समय लाग्ने देखिएको छ। विस्फोटक पदार्थ खरिद गर्न सरकारले स्वीकृति दिइसकेको छ। यसअघि चारवटा पुल निर्माण सम्पन्न भएर सञ्चालनमा आइसकेका छन्।
नारायणगढ-मुग्लिन सडक भएर दैनिक १० हजारभन्दा बढी सवारी साधन आवतजावत गर्छन्।
