हिमाल प्रेस 
फाइल तस्बिर।
पाल्पा– लामो समयसम्म परेको खडेरीले कृषि बालीमा असर पुगेको छ। आकाशे पानी नपरेपछि खेतबारी तथा करेसाबारीमा लगाइएका अन्नबाली तथा तरकारी सप्रन पाएका छैनन्।
मकै, तरकारी, फलफूल खेती सिँचाइ अभावले सुक्न थालेका छन्। मकै खेतीले हराभरा हुने खेतबारी यतिबेला सुक्खा बनेका छन्।
यस समय खेतमा लगाएको मकै स्याहार्ने चटारो हुने गरेकोमा यस पटक खेतमै घुँघा नलाग्दै सुकेर नष्ट भएको पाल्पाको रामपुरकी कृषक राधिका भण्डारीको भनाइ छ।
‘अघिल्ला वर्षमा खेतमा लगाएको मकै पाकेर स्याहार्ने चटारो हुन्थ्यो, खडेरीले अहिले त एउटा घोँगा पनि मकै स्याहार्न पाइएन, किसानलाई खेती गरेर खान पनि समस्या छ,’ उनले भनिन्।
खेतमा लगाएको मकैले वर्ष दिनसम्म गाई भैंसीलाई आहार व्यवस्थापनका लागि सजिलो हुने गरेकोमा यस पटक उत्पादन स्याहार्न नपाउँदा बजारबाट खरिद गरेर पशुपालन गर्ने अवस्था सिर्जना भएको उनले बताइन्।
जेठ अन्तिम सातादेखि यस क्षेत्रमा खेतमा पाकेका मकै स्याहार्ने कामले किसान व्यस्त रहन्थे। हिजोआज किसानको दिन फुर्सदिलो बनेको छ।
सिँचाइ सुविधा भएका खेतबारीमा पनि आकाशे पानीको अभावले राम्रोसँग मकै सप्रन सकेको छैन। पानीका मूल खडेरीले सुक्दै जान थालेपछि सिँचाइ सुविधा पुगेका जमिन सुक्खा बनेका छन्।
लामो समय खडेरीले खोला, नदीनालाका मूल, कुवाका पानी सुक्न थालेपछि कुलो तथा नहरबाट सिँचाइका लगिएका पानी खेतको मुहानमा पुग्नै समस्या रहेको कृषक घनश्याम देवकोटाले बताए।
‘नहर, कुलोको पानी खेतको मुहानमा पुर्याउन सकिएको छैन, तरकारी खेतीमा खानेपानी आयोजनाको पानी बिहान साँझ बोकेर राख्ने हो। दिनभर चर्को घामले पानी राखे नराखेको केही फरक छैन,’ उनले भने।
खडेरीले मकैबाली तथा तरकारी खेतीमा नराम्रो असर गरेपछि यस पटक मकैबाली उत्पादन घट्ने रामपुर नगरपालिकाका कृषि शाखा प्रमुख रामहरि पाण्डेयको भनाइ छ।
उनका अनुसार रामपुरका सिँचाइको पर्याप्त सुविधा भएका केही ठाउँमा लगाएको मकै आकाशे पानीको अभावले राम्रोसँग सप्रन सकेका छैनन्। घोका लागेका केही मकैमा किरा लाग्नेजस्ता समस्या देखिएको छ भने दाना पनि त्यति राम्रोसँग नलागेको किसान बताउँछन्।
दुःख गरेर लगाएको बाली स्याहार्न नपाई खडेरीले खेतबारीमै सुक्दा किसान मारमा परेका छन्। खेतबारी खनजोत, मकै गोडमेल, मलजलका लागि गरेको लगानी खेर गएकोमा किसान चिन्तित बनेका छन्।
