हिमाल प्रेस 
काठमाडौँ- रामेछापको सदरमुकाम मन्थली नगरपालिका र सुनापति गाउँपालिका–४ बेथानमा सडक बत्ति जडान गरिएको छ। नेपाल विद्युत् प्राधिकरणले स्थानीय तहहरूसँगको सहकार्यमा सडक बत्ति जडान गरेको हो।
प्राधिकरणले दुवै स्थानीय तहका सडकहरूमा स्मार्ट सडक बत्ती (स्मार्ट स्ट्रिट लाइट) जडान गरेको हो। मन्थली र बेथानको मुख्यमुख्य चोकहरूमा र सडकमा बत्ति राखेको छ।
बत्ति राखेपछि रातिको समयमा उक्त क्षेत्रहरू झिलिमिली बनेका छन्। मन्थली नगरपालिमा पर्ने करिब ६ किलोमिटर बजार क्षेत्रमा कम विद्युत् खपत गरी बढी उज्यालो दिने बत्ति जडान गरिएको प्राधिकरणले जानकारी दिएको छ।
ऊर्जा दक्षतायुक्त १७० वटा सडक बत्ति जडान गरिएका प्राधिकरणको भनाइ छ। प्राधिकरणका अनुसार सो क्षेत्रहरूमा ६० वाटका एस्ट्रोलाइट १९ वटा, ६० वाटकै स्मार्ट लाइट ८० वटा र ९० वाटका स्मार्ट लाइट ७१ वटा जडान गरिएको छ।
मन्थलीको बसपार्क र विनिता चोकमा १२.५ मि. अग्लो पोलमा चारै दिशामा उज्यालो छर्ने अत्याधुनिक ‘हाइमास्ट लाइट’ जडान गरिएको छ। कम विद्युत खपत गरी उज्यालो बढी दिने हाइमास्ट जडान गरिएको प्राधिकरणले जानकारी दिएको छ। दुवै स्थानीय तहका उक्त क्षेत्रहरूमा सडक बत्ति जडान गर्न १ करोड ५६ लाख रुपैयाँ लागत परेको प्राधिकरणको भनाइ छ।
त्यस्तै सुनापति गाउँपालिकाको बेथान क्षेत्रमा ३३१ स्मार्ट लाइट जडान गरिएको छ। त्यसमा ६० वाटका एस्ट्रो र स्मार्ट लाइट क्रमशः १४८ र १८३ वटा रहेका छन्। १२.५ मि. अग्लो पोलमा ३ वटा हाइमास्ट लाइट जडान गरिएको छ। सडक बत्तिको लागत २ करोड रुपैयाँ रहेको छ।
मन्थली क्षेत्रमा जडान गरिएको सडक बत्तिको उद्घाटन प्राधिकरणका कार्यकारी निर्देशक कुलमान घिसिङ र नगरपालिकाका प्रमुख लब श्रेष्ठले संयुक्त रूपमा गरे। त्यस्तै बेथानमा जडान गरिएको बत्तिको उद्घाटन कार्यकारी निर्देशक घिसिङ र सुनापति गाउँपालिकाका अध्यक्ष ठूलोकान्छा तामाङले संयुक्त रूपमा गरे। कार्यकारी निर्देशक
स्ट्रिट लाइटले रातको समयमा सडकको यात्रा सुरक्षित र सडक तथा सहरी सौन्दर्यलाई वृद्धि गरी रात्रिकालीन सौन्दर्यता बढाउने कार्यकारी निर्देशक घिसिङले बताए।
सडक बत्तिको महसुल सम्बन्धित पालिकाले तिर्नेछन्।
