हिमाल प्रेस 
फाइल तस्बिर।
बैतडी– बैतडीमा लम्पी स्कीन रोगबाट ८ हजार २ सय पशुचौपाया संक्रमित भएका छन्। हालसम्म लम्पी स्कीनबाट ५ सय २ पशुचौपाया मरेका छन्।
भेटेरीनरी अस्पताल तथा पशु सेवा विज्ञ केन्द्रका प्रमुख गुमानीदत्त पन्तका अनुसार जिल्लामा गत मंसिरमा पाटनमा केही किसानले पालेका पशुमा यो रोग देखिएको थियो। हाल जिल्लाभरि फैलिएको छ।
लम्पी स्कीनबाट बाच्छाबाच्छी, गाई, गोरु र भैंसी बढी प्रभावित भएका छन्। लम्पी स्कीनबाट २ हजार तीन सय ४८ बाच्छाबाच्छी, २ हजार ९ सय ६० गाई, २ हजार २ सय ८० गोरु र ६ सय ४५ भैंसी संक्रमित भएका छन्।
लम्पी स्कीन रोगले गाई, गोरु र भैंसी धमाधम मर्न थालेका छन्। हालसम्म १ सय ३५ बाच्छाबाच्छी, १ सय ७६ गाई, १ सय ३२ गोरु र ३० भैंसी मरिसकेका पन्तले जानकारी दिए।
लम्पीस्कीनबाट धमाधम पशुचौपाया मर्न थालेपछि किसान चिन्तित बनेका छन्।
घरपालुवा पशुमा संक्रमण र उक्त रोगले धमाधम मर्न थालेपछि चिन्ता बढेको दोगडाकेदार-३ श्रीकोटका मानसिंह विष्टको भनाइ छ।
‘घरपालुवा जनावर धमाधम थला पर्न थालेका छन्। औषधि उपचार पनि छैन,’ उनले भने। मकै छर्ने बेला गोरु बिरामी भएको उल्लेख गर्दै विष्टले रोपाइँ गर्न समस्या भएको बताए।
‘मकै छर्ने बेला गोरु बिरामी भएर समस्या भयो, अब रोपाइँ गर्ने बेला भयो, के गर्ने भन्ने चिन्त छ,’ उनले भने।
रोगबारे प्रदेश सरकार र केन्द्र सरकारलाई जानकारी गराइसकेको प्रमुख पन्तको भनाइ छ। जिल्लाका ८४ वटै वडामा यो रोग फैलिसकेको छ।
नियन्त्रणका लागि सामान्य औषद्योपचार भइरहेको भए पनि नियन्त्रण हुन नसकेको पन्तको भनाइ छ। लम्पी स्कीनको औषधि नभएका कारण यो रोगबाट प्रभावित पशुको उपचारमा समस्या भएको छ।
‘सामान्य औषद्योउपचारबाहेक अन्य कुनै नियन्त्रणको उपाय छैन, सरकारी जनशक्ति मात्रै यो रोग नियन्त्रण हुने अवस्था छैन। अहिले संक्रमित देखिएका पशु पनि मर्ने क्रम झन बढ्ने देखिन्छ,’ उनले भने।
लम्पी स्कीन रोग नियन्त्रणका लागि सरकारीबाहेकका अन्य दश जनशक्ति परिचालन र खोपको व्यवस्था हुनुपर्नेमा पन्तको जोड रहेको छ। उनले भने, ‘रोग नियन्त्रणका लागि सरकारी जनशक्तिले पुग्दैन, अन्य जनशक्ति पनि परिचालन गर्नुपर्छ। साथसाथै खोपको पनि व्यवस्था हुनुपर्छ।
जिल्लामा गत फागुनमा यो रोग भएको प्रमाणित भएको थियो। पशुचौपायामा ज्वरो आउने, सिँगान तथा र्याल बगाउने, शरीरमा गीर्खा आउने, खुर पाक्नेलगायत लक्षण देखिने गरेका छन्।
यो रोग झिंगा, लामखुट्टे र किर्नाले टोकेमा वा दानापानी, चरन क्षेत्र र पशुको आपसमा संसर्गका माध्यमबाट फैलिने भएकाले सचेत रहन अपिल गरिएको छ। रोग नियन्त्रण गर्न किसानले भुसुना, किरा र लामखुट्टे नियन्त्रणका लागी गोठको सरसफाइ, भकारो (पर्सो) व्यवस्थापन र चरन क्षेत्रको ख्याल गर्नुपर्ने हुन्छ।
