![तनहुँको व्यास नगरपालिकामा ५६ प्रतिशत योजना सम्पन्न](https://himalpress.com/wp-content/uploads/2022/12/byas-nagar.jpg)
तनहुँ– तनहुँको व्यास नगरपालिकाले चालु आर्थिक वर्षमा ५६ प्रतिशत योजना सम्पन्न गरेको छ। चालु आर्थिक वर्ष २०७९/८० मा १ हजार २ सय ४५ योजना रहेकामा ६ सय ९५ योजना सम्पन्न भएको मेयर वैकुण्ठ न्यौपानेले जानकारी दिए।
उनकाअनुसार यस अवधिमा ४ सय ४४ योजना सम्झौता भएका, १ सय ३ योजना सम्झौता हुन बाँकी रहेका र ४ वटा योजना सूचना प्रकाशनमा गएको छ। ‘यो एक वर्षको अवधिमा ५६ प्रतिशत योजना सम्पन्न भइसकेको छ भने ३६ प्रतिशत योजना सम्झौता भई नौ प्रतिशत योजना सम्झौता हुन बाँकी छ,’ उनले भने।
यस अवधिमा पूर्वाधारतर्फ केही महत्त्वपूर्ण कार्य भएको मेयर न्यौपानेले जानकारी दिए। गण्डकी प्रदेश सरकारसँगको सहकार्यमा दमौली केशवटार मार्ग कालोपत्र गर्न १ करोड ३० लाख रुपैयाँको योजना निर्माण प्रक्रियामा रहेको छ। संघ सरकारसँगको समपूरक योजनाअन्तर्गत खड्गकाली मार्ग कालोपत्र थप निर्माणका लागि टेन्डर भएको न्यौपानेले बताए।
विश्व बैंकको सहयोगमा नेपाल सहरी शासकीय पूर्वाधार विकास कार्यक्रमअन्तर्गत परासर मार्ग (घाँसीकुवा-फराकचौर-पोख्रेलफाँट-माँझफाट-नरंगा-कलेस्ती) विस्तृत परियोजना प्रतिदेन पुनरावलोकन भइरहेको उनले बताए।
यही अवधिमा वडा ६, १३ र १४ को सुविधासम्पन्न वडा कार्यालय भवन निर्माण सुरु भएको जनाइएको छ। नगरपालिकाले स्थानीय तहमा जनप्रतिनिधि निर्वाचित भएर आएको १ वर्ष अवधिमा व्यास-११ पोल्याङमा शीतभण्डार निर्माण कार्यसम्पन्न भएको, व्यास-१० वैरेनीमा एकीकृत जग्गा विकास आयोजनाका लागि नगर विकास कोषसँग जग्गा सम्झौता भई पूर्वाधार निर्माणका लागि जग्गा सम्याउने कार्य भइरहेकालाई मुख्य उपलब्धिका रूपमा मानेको छ।
संघ सरकारसँगको विशेष योजनाअन्तर्गत व्यास-५ मानुङकोट लिफ्टिङ खानेपानी आयोजना, व्यास-१४ केशवटार लिफ्टिङ खानेपानी योजना, (गजौडे पुल) को २ अर्ब ८२ करोडको टेन्डर प्रक्रिया अगाडि बढेको मेयर न्यौपानेले जानकारी दिए।
शिवपञ्चायन क्षेत्रमा एक सय फिट उचाइको व्यास मूर्ति निर्माण कार्य, व्यास-३ बिपी वनवाटिका खेलमैदान, व्यास-११ कोलढुंगा क्रिकेट मैदान, व्यास-५ परासर खेलमैदान र चिन्तुटार खेल मैदानलगायत खेलमैदान निर्माणाधीन अवस्थामा रहेको जनाइएको छ।
व्यास-१० मा नारेश्वर ताल निर्माण कार्य प्रारम्भ भएको र नगरपालिकाको पहलमा मादीनदी तटबन्ध कार्यमा प्रदेश सरकारको सहयोगमा तटबन्ध कार्यलाई अघि बढाइएको जनाइएको छ। चालु आर्थिक वर्षमा नगरपालिकाभित्र २ ३३ घर नक्सा पास, ३ सय ६० सम्पन्न, चार सय डीपीसी सम्पन्न, छ घर कायम, २ सय ६५ नयाँ घरदर्ता, एक सय ३० नक्सा नामसारी, ५५ नक्सा नवीकरण भएको छ।
चालु आर्थिक वर्षको कूल बजेट १ अर्ब ७१ करोड ६५ लाख नौ हजार रहेकामा हालसम्मको कूल आय १ अर्ब १३ करोड १३ लाख ८६ हजार ९ सय ८९ रहेको छ। चालुतर्फ ६८ दशमलव २ र पुँजीगततर्फ ३३ दशमलव ७९ प्रतिशत बजेट खर्च भएको छ। नगरपालिकाले आन्तरिक आयतर्फ हालसम्म११ करोड ९ लाख ३ हजार सात सय ४४ संकलन गरेको छ।
नगरले १ वर्षमा ९ वटा विधेयक, १२ कार्यविधि, २ निर्देशक पारित गरी लागू गरेको जनाएको छ। शिक्षातर्फ ४३ जना अभिभावकविहीन बालबालिकालाई आवासीय सुविधा प्रदान गर्न विद्यालय सञ्चालन गरिएको, नेपाल सरकार शिक्षा विभागबाट काटिएको ५३ प्रावि दरबन्दी मिलान गरिएको, शिक्षक दरबन्दी काटिएपछि दरबन्दी अभाव भएका विद्यालयमा ४० जना स्वंयसेवक शिक्षक नियुक्ति गरिएको जनाइएको छ।
फोहरमैला व्यवस्थापनका लागि जग्गा खरिद प्रक्रिया अघि बढाई सफाइ केन्द्रको स्थायी प्रबन्ध नहुँदासम्म वडा १३ र ३ का स्थानीयवासीसँग समन्वय गरी फोहर विसर्जन कार्य दैनिक रूपमा गरिँदै आएको नगरपालिकाले उल्लेख गरेको छ।
चालु आर्थिक वर्षमा संघ, प्रदेश सरकारले समानीकरण बजेटअन्तर्गत अन्तिम किस्ताको ५० प्रतिशत अनुदान कटौती गरेको र आन्तरिक आम्दानी ५० प्रतिशत मात्रै भएकाले क्रमागत योजनाको चाप र दबाबले लक्षित गरिएका योजना सम्पन्न गर्न कठिनाइ भएको मेयर न्यौपानेले बताए। -रासस