प्रिन्सिपल प्रधानलाई शिक्षा ज्योति पदक

काठमाडौँ– ललितपुरको कुपण्डोलस्थित नाइटिंगेल इन्टरनेसनल सेकेन्डरी स्कुलकी प्रिन्सिपल रञ्जना प्रधानलाई शिक्षा ज्योति पदकबाट विभूषित गरिएको छ। नेपाल राष्ट्रको गौरव एवम् नेपाली जनताको हित अभिवृद्धिमा उल्लेखनीय योगदानको सम्मानस्वरूप प्रधानलाई उक्त पदकद्वारा विभूषित गरिएको गृह मन्त्रालयले जनाएको छ।

विगत तीन दशकदेखि शिक्षण पेसामा सक्रिय प्रधान शैक्षिक प्रशासनमा अब्बल मानिन्छिन्। यसअघि पनि विभिन्न पुरस्कार र सम्मानबाट सम्मानित प्रधानले सरकारका तर्फबाट विभूषित हुन पाउँदा आफूलाई थप जिम्मेवारीबोध भएको बताइन्। उनले भनिन्, ‘यस्ता सम्मानले शैक्षिक क्षेत्रमा अझै केही गरौँ भन्ने प्रेरणा मिलेको छ।’ अध्यापन र शैक्षिक क्षेत्रको नेतृत्वबाहेक गायन पनि उनको रुचिको क्षेत्र हो।