हिमाल प्रेस 
काठमाडौँ- पूर्वराष्ट्रपति विद्यादेवी भण्डारीले नेपाल र भारतबीचको सीमा क्षेत्र चुस्त र स्पष्ट राख्नुपर्ने बताएकी छन्। शनिबार काठमाडौँमा एक कार्यक्रममा उनले सांस्कृतिक र कूटनीतिक सम्बन्ध सुधारका लागि भौगोलिक सीमा स्पष्ट हुनुपर्ने बताएकी हुन्।
उनले शनिबार सुरेन्द्र भण्डारी र अच्युत गौतमद्वारा लिखित ‘नेपालइन्डिया फ्रन्टियर डिप्लोमेसी इन रिफ्रेन्स टु काली रिभर : पर्स्पेक्टिभ अफ इन्टरनेशनल ल’ नामक कूटनीतिक पुस्तक लोकार्पण गरिन्। सोही सन्दर्भमा उनले उक्त दुई देशको सांस्कृतिक र कूटनीतिक सम्बन्ध सुधारका लागि देशबीचको भौगोलिक सिमाना पनि स्पष्ट हुुनुपर्ने बताएकी हुन्।
कालापानी, लिपुलेक र लिम्पियाधूरा नेपाली भूभाग भएकाले दुई देशबीचको सीमाको सबैले सम्मान गर्नुपर्ने उनको भनाइ थियो।
कालापानी, लिपुलेक र लिम्पियाधूरा नेपालको नक्सामा समावेशपछि मुलुकमा सार्वभौमिकता, राष्ट्रिय एकता र राष्ट्रियताका सिलसिलामा ऐतिहासिक नयाँ चेतना जागृत भएको उनले बताइन्।
उक्त पुस्तकमा नेपालको भारत र चीनसँगको सम्बन्ध र सीमा तथा बेलायतलगायत देशसँग सम्बन्धित विभिन्न तथ्यतथ्याङ्क समावेश छन्।
