हिमाल प्रेस 
भारत उत्तर प्रदेशको प्रयागराजमा पूर्वसांसद अतिक अहमद र उनका भाइ अशरफको गोली हानी हत्या गरिएको छ।
उत्तर प्रदेश प्रहरीले पूर्व सांसद अतिक अहमद र उनका भाइको हत्या भएको पुष्टि गरेको हो। प्रहरीका अनुसार आक्रमणकारीहरू पत्रकारका रूपमा आएका थिए। तीनै आक्रमणकारीलाई पक्राउ गरिएको प्रहरीले जनाएको छ।
यसैबीच मुख्यमन्त्री योगी आदित्यनाथले यस घटनाका विषयमा उच्चस्तरीय बैठक बोलाएका छन्। उनले यस विषयमा उच्चस्तरीय छानबिनको आदेश दिएका छन्। घटनाको छानबिन गर्न तीन सदस्यीय न्यायिक आयोग पनि गठन गरिएको छ।
अतीक अहमद र उनका भाइ अशरफलाई कानुनी प्रक्रियाहरू पूरा गर्न उपचारका लागि लगिएका बेला हत्या भएको त्यहाँको प्रहरीले जनाएको छ। अतिक र अशरफलाई प्रहरीले प्रयागराजको कोल्भिन अस्पतालमा मेडिकल जाँचका लागि लगेको थियो।
अस्पताल नजिकै प्रहरीले घेरिएका अतिक र अशरफलाई पत्रकारका रूपमा आएका आक्रमणकारीले नजिकबाट गोली हानेका थिए। उनीहरूको मृत्युपछि ती आक्रमणकारीले धार्मिक नारा लगाएका थिए।
प्रहरीका अनुसार घटनामा एक प्रहरी घाइते भएका छन् भने एक पत्रकार पनि सामान्य घाइते भएका छन्। आक्रमणपछि प्रहरीले अस्पताल वरपरको क्षेत्रमा नाकाबन्दी गरेको छ। आक्रमणकारीको बारेमा सोधपुछ भइरहेको र थप विवरण पछि सार्वजनिक गरिने प्रहरीको भनाइ छ।
राजु पाल हत्या प्रकरणका साक्षी उमेश पालको हत्याको सम्बन्धमा उत्तर प्रदेश प्रहरीले अतिक र अशरफसँग सोधपुछका लागि पक्राउ गरेको थियो।
उनीहरू दुवैको सोधपुछ सकिएपछि उनीहरूलाई पुनः न्यायिक हिरासतमा पठाउने र त्यसअघि स्वास्थ्य परीक्षण गर्नुपर्ने थियो।
अतिक अहमदले प्रहरी हिरासतमा आफ्नो सुरक्षाका लागि सर्वोच्च अदालतमा निवेदन दिएका थिए। राजु पाल हत्या प्रकरणमा अतिक अहमद र अन्य दुई अभियुक्तलाई आजीवन कारावासको सजाय सुनाइएको थियो भने अशरफलाई मुद्दामा सफाइ दिइएको थियो।
#WATCH | Uttar Pradesh: Moment when Mafia-turned-politician Atiq Ahmed and his brother Ashraf Ahmed were shot dead while interacting with media.
(Warning: Disturbing Visuals) pic.twitter.com/xCmf0kOfcQ
— ANI (@ANI) April 15, 2023
दुई दिनअघि छोराको ‘इन्काउन्टर’
गत बिहीबार अतिकका छोरा असद र उनका सहयोगी गुलाम मोहम्मदलाई झाँसीमा उत्तर प्रदेश प्रहरीको ‘स्पेशल टास्क फोर्स’ले ‘इन्काउन्टर’ गरेको थियो। असद र गुलामको अन्तिम संस्कार शनिबार नै प्रयागराजमा भएको थियो।
यूपी पुलिसका अनुसार असद र गुलाम उमेश पालको हत्यामा ‘वान्टेड’ थिए र दुवैमाथि पाँच लाख रुपैयाँ इनाम घोषणा गरिएको थियो।
यूपी सरकारको निशानामा अतिक
उत्तर प्रदेशमा मुख्यमन्त्री योगी आदित्यनाथको सरकारले माफिया र अपराधीविरुद्ध कडा कारबाही सुरु गरेको छ। पछिल्लो ६ वर्षको अवधिमा गरिएको कारबाहीमा अतिक अहमदको समूहका धेरै सदस्य पक्राउ परेका छन्।
अतिक अहमदमाथि सयभन्दा बढी मुद्दा दर्ता भएका छन्। उनलाई साबरमती कारागारमा राखिएको थियो र उनीविरुद्ध एमपीएमएलए अदालतमा ५० भन्दा बढी मुद्दामा भिडियो कन्फरेन्समार्फत कारबाही भइरहेको थियो। तर अतिक अहमदको आपराधिक इतिहासमा सयभन्दा बढी मुद्दा दर्ता छन्।
अतिक अहमद बीएसपी विधायक राजु पाल हत्याका मुख्य आरोपी हुन्। यस विषयमा अहिले सीबीआईले अनुसन्धान गरिरहेको छ।
यस वर्ष २८ मार्चमा, प्रयागराजको एमपीएमएलए अदालतले अतीकलाई २००६ मा उमेश पालको अपहरण गरेकोमा दोषी पाएको थियो। र, उनलाई आजीवन कारावासको सजाय सुनाएको थियो।
उमेश पाल राजु पाल हत्या प्रकरणमा प्रारम्भिक साक्षी थिए, तर पछि मुद्दाको अनुसन्धान गरिरहेको सीबीआईले उनलाई साक्षी बनाएको थिएन।
अतिकका भाइ अशरफ उर्फ खालिद आजमीविरुद्ध ५२ वटा मुद्दा दर्ता छन्, जसमा हत्या, ज्यान मार्ने उद्योग, दंगालगायत छन्। उमेश पालको हत्यामा अशरफलाई पनि आरोपी बनाइएको छ।
यद्यपि उमेश पाल अपहरण मुद्दाको फैसलामा अशरफलाई निर्दोष पाइएको थियो। यस मुद्दामा अतिक र अन्य २ जना दोषी ठहर भएका थिए भने ६ जना अभियुक्तलाई सफाइ दिइएको थियो।
अशरफलाई बरेली जेलमा राखिएको थियो। उनलाई पेशीका लागि प्रयागराज ल्याइएको थियो। बीबीसी हिन्दी
