बौद्ध युवा क्लबले जित्यो सेभेन ए साइड फुटबल

म्याग्दी- म्याग्दीको बेनी नगरपालिका-२ बगरफाँटमा आयोजना गरिएको एक लाख रुपैयाँ पुरस्कार राशिको प्रथम सेभेन ए साइड खुल्ला फुटबल बौद्ध युवा क्लब बेनी मंगलाघाटले जितेको छ।

नयाँ वर्ष २०८० को अवसर पारेर रिभरसाइड बगरफाँट युवा क्लबले आयोजना गरेको उक्त प्रतियोगिताको शुक्रबार साँझ भएको फाइनल खेलमा रिभरसाइड युवा क्लबलाई चारका विरुद्ध तीन गोलले पराजित गर्दै वौद्ध युवा क्लब विजेता बन्न सफल भएको हो।

चैत २८ गतेदेखि चार दिनसम्म सञ्चालन भएको उक्त प्रतियोगितामा म्याग्दी र पर्वतका गरी २२ टिम सहभागी भएका थिए।

प्रतियोगितामा प्रथम हुने बौद्ध युवा क्लबले एक लाख रुपैयाँ नगद पुरस्कारसहित ट्रफी, मेडल र प्रमाणपत्र प्राप्त गर्‍यो भने उपविजेता वनेको रिभर साइड युवा क्लबले नगद ५० हजार रुपैयाँसहित ट्रफी, मेडल र प्रमाणपत्र पायो।