हिमाल प्रेस 
बनियानी– झापामा हावाहुरीसहित आएको वर्षा र असिनाले अन्न तथा तरकारी बालीमा क्षति पुर्याएको छ। शुक्रबार राति हावाहुरीसहित आएको वर्षा र असिनाले मकै, खरबुजा र तरकारी बालीमा क्षति पुर्याएको कृषि ज्ञान केन्द्र झापाका प्रमुख सागर विष्टले जानकारी दिए।
‘हावाहुरीसहित वर्षा र असिना परेपछि कृषकले क्षतिबारे जानकारी गराइरहनुभएको छ,’ उनले भने, ‘स्थलगत अनुगमन गरेर क्षतिको यकिन विवरण निकाल्छौं।’
झापाको कनकाईमा सबैभन्दा बढी क्षति भएको कृषकबाट जानकारी आएको उनले जानकारी दिए। कनकाई नगरपालिकाको कृषि शाखासँग समन्वय गरेर अनुगमन भइरहेकाले बेलुकासम्म क्षतिको विवरण आउने उनले बताए।
कनकाईसँगै भद्रपुर, बिर्तामोडका असिना परेको क्षेत्रमा धेरै क्षति पुगेको छ। तरकारी खेती गर्ने कृषि फार्महरूमा लगाइएको तरकारीमा धेरै क्षति पुगेको कार्यालयले जनाएको छ। झापामा यो वर्ष करिब ४० हजार हेक्टरमा मकैखेती लगाइएको छ। मकैबालीमा बढी क्षति पुगेको प्रमुख विष्टको भनाइ छ।
हावाहुरीले बिजुलीको पोल, घर तथा विद्यालयको टिनको छाना उडाएको जिल्ला प्रहरी कार्यालय झापाले जनाएको छ।
