फेब्रुअरीमा भित्रिए ७३ हजार पर्यटक

काठमाडौँ- सन् २०२३ को फेब्रुअरीमा ७३ हजारभन्दा बढी विदेशी पर्यटक नेपाल भित्रिएका छन्। नेपाल पर्यटन बोर्डको तथ्यांकअनुसार फेब्रुअरीमा ७३ हजार २५५ पर्यटक त्रिभुवन अन्तर्राष्ट्रिय विमानस्थल हुँदै नेपाल भित्रिएका हुन्। यो वर्षको जनवरीमा ५५ हजार ७४ जना पर्यटक नेपाल भित्रिएका थिए।

फेब्रुअरीमा भारतबाट सबैभन्दा धेरै १८ हजार ४०१ पर्यटक आएका छन्। त्यस्तै अमेरिकाबाट ७ हजार ८८७, थाइल्याण्डबाट ४ हजार ८०२, दक्षिण कोरियाबाट ३ हजार २४६ पर्यटक नेपाल भित्रिएको बोर्डले जानकारी दिएको छ।

अष्ट्रेलियाबाट २ हजार ९६९, चीनबाट २ हजार २६६, म्यानमारबाट २ हजार २३२, श्रीलंकाबाट २ हजार ११७ र जर्मनीबाट २ हजार १०८ पर्यटक नेपाल भित्रिएको तथ्यांक छ। सन् २०२२ को फेब्रुअरीमा १९ हजार ७६६ पर्यटक नेपाल आएका थिए। पछिल्लो तथ्यांकले कोरोना महामारीपछि फेब्रुअरीमा धेरै पर्यटक आएका छन्।