विदेशमा रहेका नेपालीलाई बुधबारदेखि स्वास्थ्य परामर्श सेवा दिइने

काठमाडौँ- वैदेशिक रोजगार बोर्डले विदेशमा रहेका नेपालीलाई स्वास्थ्य परामर्श सेवा दिने भएको छ। वैदेशिक रोजगारीमा रहेका नेपालीले टेलिफोनमार्फत आफ्नो स्वास्थ्य समस्या तथा सामाधानका उपायबारे चिकित्सकबाट जानकारी पाउने भएका छन्।

टेलिमेडिसिन सेवा बुधबार (चैत १५ गते)बाट नै सुरु गरिने बोर्डले जानकारी दिएको छ। बोर्ड सचिवालयका सूचना अधिकारी राजन पौडेलले उक्त जानकारी दिए। ‘वैदेशिक रोजगार बोर्डको सचिवालयले टेलिमेडिसिन सेवा सुरु गर्न लागेको छ,’ उनले भने, ‘नेपालबाट श्रम स्वीकृति लिएर वैदेशिक रोजगारीमा गएकाहरूलाई परेको कुनै पनि स्वास्थ्य समस्याबारे सेवा दिने उद्देश्यले सेवा सुरु गरेका छौँ।’