हिमाल प्रेस 
काभ्रे- ग्रामीण सडक खन्न लाग्दा भित्ताको चेपभित्रको गुफामा कलात्मक आकृति भेटिएपछि यहाँ अहिले अवलोकन गर्न आउनेको घुइँचो छ।
काभ्रेपलाञ्चोकको नमोबुद्ध नगरपालिका–९ दाप्चाको घट्टेखोलास्थित सडक छेउको भित्तामा रहेको गुफामा चुनढुंगाको कलात्मक आकृति भेटिएपछि त्यहाँ मानिसको भीड लागेको हो।
गुफाका भित्ताभर विभिन्न आकृतिका कलात्मक चित्रहरू देखिएपछि देवीदेवताको बासस्थान रहेको भन्दै पूजा गर्न थालिएको छ। अहिले सो ठाउँमा दैनिक सयौँको संख्यामा स्थानीय बासिन्दा जाने गरेका छन्। वडा नं ८ गहतेका हिराबहादुर तामाङले छोराले सामाजिक सञ्जालमा गुफाका बारेमा राखेको थाहा पाएर हेर्न आएको बताए।
वडा नं ९ बाघमाराका बद्री श्रेष्ठले भित्र पस्न अफ्ठेरो भए पनि गुफाभित्र पुगेपछि देवीदेवताको विभिन्न आकृति देख्न पाइएको बताए। ‘धेरै पटक भित्र गएर हेरेको छु,’ उनले भने, ‘त्यहाँ गएपछि धेरै आकर्षक आकृतिहरू हेर्न पाइन्छ।’
सो ठाउँको जग्गाधनीसमेत रहेका वडा नं १० का विनोद लामाले वडा नं ९ बाट बसेरी जोड्ने सडक खन्ने बेलामा सो ठाउँमा फूल आकृतिको ढुंगाका साथै बाघको दाह्राजस्तो ढुंगासमेत फेला पारेको बताए।
‘करिब दुई वर्षअगाडि सो ठाउँ भएर सडक खन्ने क्रममा भित्ताको चेपमा मान्छे पस्न सक्ने सानो दुलो देखापरे पनि करिब एक महिनाअगाडि मात्रै भित्र पसेर हेर्दा विभिन्न आकृति पाइएपछि मानिसको भीड बढ्न थालेको हो,’ उनले भने, ‘सुरुमा शिवलिंग आकारको ढुंगा फेला परेकामा पछि हेर्न आउनेहरूले त्यो ढुंगा लिएर गएको बताइएको छ।’ भित्र मिलेर बस्दा आठ/दसजना अटाउने ठाउँ रहेको लामाले बताए।
वडा नं ९ का हरेराम श्रेष्ठले त्यहाँ भएका कलात्मक वस्तु हेर्न आउनेहरूले केही मूर्ति घरमा लगेर पूजा गरेको भन्ने कुरा पनि सुन्नमा आएकाले त्यसको संरक्षणका लागि आफूहरू जुटेको जानकारी दिए। गुफाभित्रे टल्किरहेको आकृतिमा धूप बत्ती बालेर पूजा गर्नेको भीड बढेको छ तर त्यसले प्राकृतिक सुन्दरमा असर पार्ने भएकाले त्यसो नगर्न र संरक्षणमा सबै लाग्न आवश्यक रहेको सोही ठाउँका पुष्पराज श्रेष्ठले बताए।
स्थानीय बासिन्दा ज्ञानबहादुर लामाले सो ठाउँ वडा नं ९ र १० को सिमानामा रहेको हुनाले संरक्षण र प्रवर्द्धनका लागि दुवै वडा मिलेर आवश्यक बजेट व्यवस्थापन गर्न पहल गर्नुपर्नेमा जोड दिए। त्यसका लागि संरक्षण समिति बनाउन आफूहरू लागिरहेको उनले बताए।
बुद्धपार्क संरक्षण समितिका अध्यक्षसमेत रहेका लामाले दाप्चाको सो भेगलाई नै समेटेर पर्यटकीय क्षेत्रकारूपमा विकास गर्न सबैको साथ र सहयोग हुनुपर्ने आवश्यकता औँल्याए।
