महाशिवरात्रि आयो‍जनाका लागि पर्यटनमन्त्रीको अध्यक्षतामा मूल समारोह समिति गठन

काठमाडौँ– महाशिवरात्रिको तयारीका लागि संस्कृति, पर्यटन तथा नागरिक उड्ययनमन्त्री सुदन किरातीको अध्यक्षतामा मूल समारोह समिति गठन गरिएको छ।

पशुपति क्षेत्र विकास कोष सञ्चालक परिषद्को अध्यक्षसमेत रहेका मन्त्री किरातीको अध्यक्षतामा बसेको बैठकले मूल समारोह समिति गठन गरेको हो। पशुपतिनाथमा आउने भक्तजनलाई सहज रूपमा दर्शनको व्यवस्था मिलाउन ९ वटा उपसमितिसमेत गठन गरिएको कोषका कार्यकारी निर्देशक डा. घनश्याम खतिवडाले जानकारी दिए।

कोषका सदस्य सचिव डा. मिलन थापाको संयोजकत्वमा सुरक्षा व्यवस्था तथा शंकराचार्य निश्चलानन्द सरस्वतीको संयोजकत्वमा स्वागत तथा सत्कार उपसमिति गठन गरिएको छ।

यसैगरी कोषाध्यक्ष नारायण सुवेदीको संयोजकत्वमा प्रचारप्रसार, स्वयंसेवक व्यवस्था उपसमिति, परिषद् सदस्यद्वय देवी बराल र उत्सव बडालको संयोजकत्वमा आवास, भोजन तथा भौतिक व्यवस्था उपसमिति गठन गरिएको छ।

परिषद् सदस्य विश्वकरण जैनको संयोजकत्वमा स्वास्थ्य सेवाउपसमिति, परिषद् सदस्य आशा पाण्डेको संयोजकत्वमा वातावरण, सरसफाइ तथा जुत्ताचप्पल व्यवस्था उपसमिति, परिषद् सदस्य अर्जुन वास्तोलाको संयोजकत्वमा साधुसन्त तथा पूजा पाठ व्यवस्था उपसमिति गठन गरिएको छ।

यसैगरी परिषद् सदस्य रमेशराज शिवाकोटीको संयोजकत्वमा मन्दिर दर्शन, चन्दन वितरण तथा रात्रिकालीन व्यवस्था उपसमिति, परिषद् सदस्य पूर्ण जेठाराको संयोजकत्वमा मेला, बजार व्यवस्थापन, साज सजावट उपसमिति र कोषका कार्यकारी निर्देशक डा. घनश्याम खतिवडाको संयोजकत्वमा मूल्यांकन, तथ्यांक संकलन तथा स्मारिका प्रकाशन उपसमिति गठन गरिएको छ।

बैठकले महाशिवरात्रिका अवसरमा फागुन ६ गते पशुपतिनाथ मन्दिर प्रांगणमा नेपाली सेनालाईमात्र खटाउने निर्णय गरेको छ। महाशिवरात्रिका अवसरमा कोषले लिंग पुराणसमेत आयोजना गर्न लागेको छ। यस वर्षको महाशिवरात्रिका अवसरमा जगन्नाथ पुरीस्थित गोवर्द्धन मठका शंकराचार्य निश्चलानन्द सरस्वतीलाई आमन्त्रण गरेको कोषले जनाएको छ।