हिमाल प्रेस 
मोरङ- मोरङको सुन्दरहरैंचाका नेपाली युवासँग बिहे गरेर नेपाल आएकी फिलिपिनो महिला रोज ग्रान्डा समाजका लागि उदाहरण बनेकी छन्। कोरोनाकालमा आर्थिक अभावका कारण वैदेशिक रोजगारीमा जान ठिक्क परेका आफ्ना पति जंगबहादुर विश्वकर्मालाई नेपालमै काम गर्नका लागि ग्रान्डाले प्रोत्साहित गरिन्। ती दम्पतीले अहिले ‘फुड ट्रक’ सञ्चालन गरी प्रशस्त आम्दानी गरेका छन्।
विश्वकर्मा र ग्रान्डाले फुड ट्रक सञ्चालन गरिहेका छन्। फुड ट्रक भनेको चार चक्के गाडीमा मांसाहारी र शाकाहारी खानाका विभिन्न परिकार पकाएर बिक्री गर्ने होटल हो। विराटनगर–४ को कञ्चनबारीको सडक छेउमा यी दम्पतीले दिनको ३ बजेदेखि बेलुकीको ७ बजेसम्म फुड ट्रक चलाउने गरेका छन्। विराटनगरमा यो एकमात्र फुड ट्रक हो। फुड ट्रकबाट दैनिक १५ देखि २० हजार रूपैयाँसम्मको व्यापार हुने गरेको छ।
२०५२ मा दुबईको स्पिनिस क्याटेरिङमा व्यवस्थापक पदमा काम गर्न विश्वकर्मा दुबई गएका थिए। त्यहीँको अर्को कम्पनी केयरफोरमा काम गर्ने फिलिपिन्सकी ग्रान्डासँग विश्वकर्माको प्रेम बस्यो। २०७५ मा दुवै स्वदेश फर्किएर अदालतमा आधिकारिक विवाह गरे।
२०७६ चैत ११ गतेदेखि देशमा कोरोनाका कारण लकडाउन भएपछि विश्वकर्मा र ग्रान्डालाई पनि आर्थिक समस्या पर्यो। लकडाउन खुलेसँगै विश्वकर्माले पुनः वैदेशिक रोजगारमा जाने तयारी गर्न थालेका थिए। तर ग्रान्डाले नेपालमै प्रशस्त सम्भावना देखिन् र आफ्ना श्रीमानलाई नेपालमा नै व्यवसाय गर्न प्रेरित गरिन्।
चार चक्के गाडीमा विभिन्न खानेकुराको परिकार बनाएर घुम्ती होटलको व्यवसाय चलाउनु विदेशमा सामान्य हो। क्याटेरिङमा काम गरेका विश्वकर्मालाई खाना बनाउने ज्ञान थियो। ग्रान्डाको सल्लाह र सुझावमा विश्वकर्माले गाडी किने र होटलको आकार दिए। यसमा उनको २२ लाख रूपैयाँ खर्च भयो। गाडीवाला होटलले हाल दैनिक २० हजारसम्मको कारोबार गर्ने गरेको छ। शान्त र जति पनि अवसर रहेको नेपाल छाड्न मनै नलागेको ग्रान्डाले बताइन्।
उनले वैदेशिक रोजगारीमा जाने युवायुवतीका लागि नेपालमै प्रशस्त अवसर रहेको बताइन्। तीन महिनाअघि मात्र नेपाली नागरिकता पाएकी ग्रान्डा आफ्ना श्रीमान् विश्वकर्मासँग अंग्रेजीमा वार्तालाप गर्छिन् भने ग्राहकसँग मज्जाले नेपालीमा कुराकानी गर्छिन्।
विराटनगर–४ स्थित नोबेल मेडिकल कलेजका चिकित्सक डा। सूर्यप्रकाश सोनीले आफू फुड ट्रकको नियमित ग्राहक भएको बताए। उनले फिलिपिन्सकी महिलाको मेहेनत देखेर आफू दंग भएको बताए। विराटनगर–२ की रेणुका श्रेष्ठले गाडीमा पकाएको खाना स्वादिष्ट हुने गरेको तर्क गरिन्। उनले फिलिपिन्सबाट आएकी ग्रान्डाबाट विदेश जान खोज्ने युवायुवतीले धेरै कुरा सिक्न सक्ने बताइन्। -रासस
