हिमाल प्रेस 
काठमाडाैँ- कागजात शंकास्पद लागेपछि कुवेतलगायत मुलुक जान लागेका १ सय ५६ जनालाई विमानस्थलबाट फर्काइएको छ।
त्रिभुवन विमानस्थल अध्यागमन कार्यालयले कागजात दुरुस्त नभएपछि शंका लागेकाे भन्दै तीन दिनमा १ सय ५६ जनालाई विमानस्थलबाट फर्काएकाे हाे।
विमानस्थल कार्यालयले साेमबार ३७ जना, बुधबार १ सय १ जना र बिहीबार १८ जना गरी १ सय ५६ जनालाई फर्काइएकाे जानकारी दिएकाे छ।
कार्यालयका वरिष्ठ अध्यागमन अधिकृत झंकनाथ ढकालले उनीहरूको भिसा परीक्षण गर्दा कतिपयको ‘वेटिङ फर एप्रुभ’ भनेको भेटिएको, कतिपयको व्यक्तिगत श्रम स्वीकृतिमा जान लागेको देखिएको तर दूतावासबाट श्रम स्वीकृतिको बोधार्थ प्राप्त नभएको तथा एउटा देशमा जाने भनेर कागजात पेस गरिएको तर भिसा अर्कै देशको पाइएकाले फर्काइएकाे बताए।
‘यी कागजातहरू सही हुन पनि सक्छन् र गलत हुन पनि सक्छन्, तर कागजात शंकास्पद देखिएकाले रोकिएका छन्, यस विषयमा वैदेशिक रोजगार विभाग, परराष्ट्र मन्त्रालयसँग समन्वय गरेर मात्रै निर्क्याैल हुनेछ,’ उनले भने।
यसअघि जोर्डन जान लागेका १५ जनालाई पनि विमानस्थलबाट फर्काइएकाे थियाे। उनीहरूको विषयमा अझै पनि केही निर्णय भएकाे छैन।
