बागलुङमा दाताकै सहयोगले बन्यो राधाकृष्ण धार्मिक पुस्तकालय

हिमाल प्रेस १४ जेठ २०८० ७:०३
10
SHARES
बागलुङमा दाताकै सहयोगले बन्यो राधाकृष्ण धार्मिक पुस्तकालय

बागलुङ– सनातन वैदिक धर्म-संस्कृतिको जगेर्ना गर्ने उद्देश्यले धार्मिक पुस्तकालय स्थापना गरिएको छ। बागलुङ नगरपालिका-२ का श्याम श्रेष्ठ (वझान्थाक्षे) र उनका परिवारजनले स्थानीय राधाकृष्ण मन्दिरमा पुस्तकालय निर्माण गरेका हुन्।

४ लाख रुपैयाँ लगानीमा स्थापित राधाकृष्ण धार्मिक पुस्तकालयको हरिहर आश्रम देवघाट आश्रमका पीठाधीश स्वामी महाराज ज्ञानानन्द सरस्वती महाराजले शुभारम्भ गरे। पुस्तकालयमा धार्मिकग्रन्थ, पुस्तकलगायत गरी पन्ध्र सय बढी पठन सामग्री संग्रह गरिएको छ।

पुस्तकालयका संस्थापक श्रेष्ठले बुवा तारा र आमा पूर्णकुमारीको स्मृतिमा पुस्तकालय स्थापना गरिएको बताए। उनले भौतिक संरचना र पुस्तक थप्दै जाने बताए। ‘धार्मिक र आध्यात्मिक पुस्तक थप्दै जान्छौं’, उनले भने, ‘राधाकृष्ण मन्दिरको एउटा अभिन्न अंगको रूपमा पुस्तकालयलाई विकास गर्ने योजना छ।’

राधाकृष्ण मन्दिर सेवा समितिका अध्यक्ष रमेशकुमार राजभण्डारीले पुस्तकालयमा धर्म, परम्परा र संस्कृतिसँग सम्बन्धित पुस्तकहरू खोजी-खोजी संग्रह गरिने बताए। उनले श्रेष्ठ परिवारले पुस्तकालयसँगै मन्दिरको भौतिक पूर्वाधार र व्यवस्थापकीय सुधारमा उल्लेखनीय सहयोग पुर्‍याएको बताए।

बागलुङ-३ मा अवस्थित राधाकृष्ण मन्दिर हिन्दू धर्मावलम्बीहरूको पवित्रस्थल हो। श्रीकृणाष्टमीलगायत धार्मिक पर्वमा सो मन्दिरमा भक्तजनको घुइँचो लाग्ने गर्छ। स्थानीयवासीले मन्दिरलाई धार्मिक सत्संग र अनुष्ठानका गर्ने स्थलका रूपमा लिने गर्छन्।

स्वामी ज्ञानानन्द सरस्वतीले धार्मिक तथा सांस्कृतिक धरोहरका रूपमा राधाकृष्ण मन्दिर विकसित भइरहेको बताए। उनले वैदिक धर्म, संस्कृति र पूर्वीय दर्शन तथा सभ्याताको उत्थान एवम् प्रसारमा धार्मिक पुस्तकालयले महत्त्वपूर्ण टेवा पुर्‍उने बताए।

उनले प्रविधि र यन्त्रमा आएको नयाँ विकासले पुस्तकालयको महत्त्व नघट्ने धारणा राखे। ‘पुस्तकालको महत्त्वपछि झन्-झन् बढ्छ’, उनले भने, ‘नयाँ-नयाँ प्रविधिको प्रयोग गरेर पुस्तकालयलाई थप सुसज्जित र समयालुकूल बनाउन सकिन्छ।’


प्रतिक्रिया

Leave a Reply

Your email address will not be published. Required fields are marked *

fifteen − two =