हिमाल प्रेस 
सँगै रहेका पुष्पा र अञ्जली, हेरिरहेकी पूजा नाम गरेकी गैँडा। तस्बिर : रमा मिश्र।
चितवन- चितवन राष्ट्रिय निकुञ्जले पालेर राखेका दुई गैँडाका बच्चालाई प्रकृतिमा छाडिएको छ। राष्ट्रिय प्रकृति संरक्षण कोष सौराहामा पालिएका ती गैँडालाई निकुञ्जको लामिताल क्षेत्रमा छोडिएको हो।
निकुञ्जका पशु चिकित्सक डा. विजय श्रेष्ठका अनुसार डार्ट नगरिकनै ट्रकमा राखेर ती दुई गैँडालाई तामिताल पुर्याएर छाडिएको छ।
निकुञ्जमा आमाबाट छुटेको अवस्थामा भेटिएका पुष्पा र अञ्जली नामका ती दुई बच्चालाई निकुञ्जकै नवलपरासी क्षेत्रबाट उद्धार गरी ल्याइएको थियो।
श्रेष्ठका अनुसार पुष्पालाई सन् २०२० को जनवरीमा नवलपरासीको तमासपुर र अञ्जलीलाई २०२१ को अप्रिलमा नवलपरासीकै कुजौलीबाट उद्धार गरिएको थियो। एक दुई महिनाको उमेरमा आमाबाट छुटेका उनीहरूलाई हुर्काएपछि प्राकृतिक रूपमा छाडिएको उनले बताए।
पुष्पा र अञ्जलीलाई यतिबेला प्राकृतिक रूपमा घाँस खोजेर खान सक्ने भएका छन्। उद्धार गरी हुर्काइएका कतिपय जंगली जनावर मित्रराष्ट्रलाई दिने, कतिपयलाई चिडियाघरमा त कतिपयलाई प्राकृतिमा राख्ने गरिँदै आएको छ।
