सेती नदीमा तारबार गर्न सांसद भट्टराईको माग

काठमाडौँ- नेकपा (एमाले) की सांसद विद्या भट्टराईले पोखरास्थित सेती नदीको जोखिम क्षेत्रमा मानवीय क्षति नहुने गरी तारबारसहितको आवश्यक व्यवस्था तत्काल मिलाउन सरकारसँग माग गरेकी छन्।

प्रतिनिधिसभा बैठकमा आइतबार बोल्दै उनले शनिबार पनि सेती नदीको खोँचमा परी स्थानीय १२ वर्षीया बालिका स्मृति पराजुलीको ज्यान गएको दुःखद् घटनाबारे संसदमा जानकारी गराउँदै त्यहाँको जोखिम क्षेत्रमा तारबारसहितको आवश्यक व्यवस्था मिलाउन सरकारसँग माग गरेकी हुन्।

त्यसका लागि सरकारले विज्ञहरुले दिएको सुझाव अनुसार त्यहाँको सुख्खा पहिरो नियन्त्रणका लागि पनि तत्काल योजना बनाएर काम गर्नुपर्ने उनको भनाइ छ। सांसद भट्टराईले भूगर्भविद्हरुले सेती नदीको कारण ठूलै क्षति हुन सक्ने औंल्याएको उल्लेख गर्दै सरकारले उनीहरुले दिएको सुझाव अनुसार त्यसको संरक्षणमा लाग्नुपर्ने पनि बताइन्।

उनले भनिन्, ‘हिजो पोखरामा दुखद घटना घटेको छ। सेती नदी पोखराको सुन्दरता हो। यसको खोँचमा धेरै नागरिकहरुको जीवनको क्षति भएको छ। यस्ता क्षति हुन नदिन जोखिम क्षेत्र वरपर तारबार लगाउने व्यवस्था गरियो।’

सांसद भट्टराईले सरकारले विगतमा पनि आफूहरुले सो नदीको संरक्षणका लागि आवश्यक व्यवस्था मिलाउन गरेको आग्रहलाई बेवास्ता गरेको भन्दै असन्तुष्टि व्यक्त गरिन्।