रवि लामिछाने फेरि जितेर संसद् आउनुहुनेछ : डीपी अर्याल

काठमाडौँ- राष्ट्रिय स्वतन्त्र पार्टीका सांसद डीपी अर्यालले पार्टी सभापति रवि लामिछानेले चितवन-२ बाट पुन:निर्वाचित भएर आउने बताएका छन्। सोमबार प्रधानमन्त्रीले विश्वासको मत माग्ने प्रस्तावमाथि छलफलमा सहभागी भएका अर्यालले यस्तो बताएका हुन्।

नेपालमै पसिना बगाउन खोज्नेलाई सारा शक्ति खर्चेर लखेट्ने काम भइरहेको उनको आरोप छ।

‘यो युवा पुस्ताको मुलुकबाहिर रहेर पसिना बगाएका नेपालीहरूको मुलुकभित्रै सम्भावना खोज्ने प्रयासलाई भएभरको शक्ति लगाएर लखेट्न खोजियो। विश्वास छ सार्वभौम जनताको सर्वाधिक मतान्तरबाट विजयी पार्टी सभापतिलाई पुनः अघिल्लो पटकभन्दा अत्याधिक मतान्तरले विजयी गराएर फेरि पठाउने नै छ, यसमा हामी पूर्ण विश्वस्त छौँ’ उनले भने।

नागरिकताको विषयमा मुद्दा परेपछि लामिछानेको सांसद पद खारेज भएको थियो। अहिले उनले पुन: नागरिकता लिइसकेका छन्।