नेपाली कागजको बजार माग धेरै, उत्पादन भने न्यून

हिमाल प्रेस १७ पुष २०७९ १२:२३
6
SHARES
नेपाली कागजको बजार माग धेरै, उत्पादन भने न्यून

गोरखा- गोरखामा उत्पादन हुँदै आएको नेपाली कागज उत्पादनका लागि कच्चा पदार्थको अभाव भएपछि बजारको माग धान्न गाह्रो परेको छ। गोरखा नगरपालिका-६ स्थित नयाँबस्तीमा सञ्चालित गोरखा मनकामना नेपाली हाते कागज उद्योगमा मागअनुसार नेपाली कागज उत्पादनका लागि कच्चा पर्दाथको अभाव हुँदै आएको हो।

कागज उत्पादनका लागि आवश्यक पर्ने लोक्ता जंगलबाट खोजेर ल्याउनुपर्ने भए पनि आवश्यकताका आधारमा कच्चा पर्दाथ आयात गर्न नसकिएको उद्योगका सञ्चालक पासाङनिमा शेर्पाले बताए। ‘जंगलमा त खोजेजति लोक्ता पाइन्छ,’ उनले भने, ‘तर जंगलमा गएर झिक्ने, सुकाउने र यहाँसम्म ल्याउने मान्छे नै पाउन गाह्रो छ।’

शेर्पाले घरेलु कार्यालयमा उद्योग दर्ता गरी नेपाली कागज उत्पादन गरेको झण्डै ५ वर्ष भइसकेको छ। ‘बजारमा जति उत्पादन गरे पनि बिक्रीका लागि कुनै समस्या छैन,’ उनले भने, ‘बरु कागज उत्पादनका लागि सधैँ कच्चा पदार्थको अभाव हुने गरेको छ।’ जंगलबाट झिकेर ल्याएको लोक्ता उद्योगले प्रतिक्विन्टल १५ हजार रूपैयाँमा खरिद गर्ने गरेको उनले बताए। एक क्विन्टल कच्चा पदार्थबाट दुई हजार थान २०–३० साइजको कागज उत्पादन हुने शेर्पाले जानकारी दिए।

उद्योगमा अहिले परिवारका तीन सदस्यसहित १० जनाले रोजगारी पाएका छन्। शेर्पाले करिब आठ लाख रूपैयाँको लागतमा उद्योग सञ्चालन गरेको बताए। ‘उद्योगका लागि दक्ष कामदारलाई खाने–बस्ने सुविधासहित १० हजारदेखि १५ हजार तलब दिने गरेको छु,’ उनले भने, ‘चर्को घाम लागेको दिन एक जना कामदारले दैनिक दुई सय पन्ना कागज उत्पादन गर्न सक्छ।’

उद्योगले उत्पादन गरेको कागज काठमाडौँमा बिक्री हुने गरेको उनको भनाइ छ। ‘उद्योगमा १० ग्राम, २० ग्राम, ३० ग्राम र ४० ग्राम तौलका कागज उत्पादन हुने गर्दछ,’ उनले भने, ‘२० ग्राम कागजको प्रतिपन्ना २० र ४० ग्राम कागजको प्रतिपन्ना ४० रूपैयाँमा नै ठूला उद्योगले खरिद गरेर लैजान्छन्।’

उनले उद्योगबाट गर्मी मौसममा दैनिक एक हजार ६ सय थान र जाडो मौसममा आठ सय थानसम्म कागज उत्पादन हुने बताए। ‘जाडो मौसममा सुक्न अलिक समय लाग्ने भएकाले गर्मी मौसममा भन्दा कम उत्पादन हुन्छ,’ शेर्पाले भने, ‘गर्मी मौसममा बढीमा तीन घण्टाभित्रमा जालीमा राखेको लेदो सुकेर कागज तयार हुन्छ, तर जाडो मौसममा सुक्न झण्डै पाँच घण्टा जति समय लाग्छ।’

राम्रोसँग उद्योग चल्दा मासिक चार लाखसम्म उद्योगमा आम्दानी हुने गरेको शेर्पाले बताए। उद्योगले मागअनुसार कागज उत्पादन गर्दै आइरहेको सञ्चालक शेर्पाको भनाइ छ। उनले उद्योगका लागि चाहिने कच्चा पदार्थ वन कार्यालयको अनुमति लिएर उत्तरी गोरखाको लाप्राक, लापु, मान्वु, खरिबोटलगायतका क्षेत्रबाट संकलन गरी ल्याउने गरिएको जानकारी दिए।

उद्योगबाट उत्पादित नेपाली कागज अघिकांश सरकारी कामकाजका लागि प्रयोग हुने गरेको भए पनि थांका र्कोने, धुप बनाउने, डायरी बनाउने, नोटबुक बनाउने काममा समेत प्रयोग हुने गरेको सञ्चालक शेर्पाको जानकारी दिए। ४० ग्रामका कागज भने नेपाल बाहिर निर्यात हुने गरेको शेर्पाको भनाइ छ।

प्रकाशित: १७ पुष २०७९ १२:२३

प्रतिक्रिया

Leave a Reply

Your email address will not be published. Required fields are marked *

thirteen + twelve =