पूर्वाधार अभावमा सुर्खेतको बहिरा बाल स्कुल

सुर्खेत– कर्णाली प्रदेशको राजधानी वीरेन्द्रनगरस्थित सिद्ध बहिरा बाल स्कुलका विद्यार्थीले शिक्षकदेखि पुस्तकसम्मका समस्या भोग्नुपरेको छ। विद्यालयमा विशेष शिक्षक र संकेत सामाग्रीको अभावले विद्यार्थीले हैरानी खेप्नुपरेको हो।

विद्यालयमा कार्यरत १० शिक्षकमध्ये ६ जना विशेष शिक्षा परिषद्‍बाट नियुक्त भएका छन् भने विद्यालयमा ४ जना हेरचाहकर्ता र ३ जना कार्यालय सहयोगी छन्।

कूल ९६ जना अध्ययनरत विद्यालयमा ८१ जना बालबालिकाले आवासीय सुविधासहितको शिक्षा लिइरहेको अवस्था छ। ०३७ सालमा स्थापना भएको यस विद्यालयको भवन जीर्ण छ। कक्षा कोठा पनि पर्याप्त छैन।

यहाँ खेल मैदान, पाठ्यपुस्तक, शैक्षिक सामग्री र शिक्षकको पनि अभाव छ। उचित स्रोतसाधन र अपर्याप्त शिक्षक दरबन्दीका कारण विद्यालयको शैक्षिकस्तर माथि उठाउन समस्या भएको प्राध्यानाध्यापक चिन्तामणि कँडेलले बताए।

‘यस विद्यालयमा प्राथमिक तहमा एक, निम्न माध्यमिक तहमा चार र माध्यमिक तहमा एक जना गरी छ जनाको दरबन्दी रहेको छ। विद्यालयमा कम्तीमा नौ जना शिक्षक आवश्यक पर्छ। अन्य विद्यालयका शिक्षकसरह यहाँका शिक्षकलाई सेवासुविधा छैन,’ विद्यालयका प्रध्यानाध्यापक चिन्तामणि कँडेलले भने, ‘साना कक्षामा सांकेतिक संकेत अभावले खासै समस्या हुँदैन। खासगरी पठनपाठनमा प्रयोग हुने सांकेतिक संकेत अभावले माथिल्लो कक्षाका विद्यार्थीहरू भने प्रभावित बन्ने गरेका छन्।’

सबै विद्यार्थी केही बोल्न नसक्ने र केही सुन्न नसक्ने छन्। जहाँ अन्य विद्यालयभन्दा फरक तरिकाले पढाउनुपर्छ। १० कक्षासम्मको विद्यालयमा ९६ जना विद्यार्थी छन्।

विद्यालयमा अध्ययनरत सबै विद्यार्थीलाई सांकेतिक भाषामै पढाउनुपर्ने हुन्छ। शिक्षकले हात र मुखको इशाले ती बालबालिकालाई अध्यापन गराउनु पर्ने हुन्छ। सिद्ध बहिरा बाल स्कुल सुन्ने र बोल्ने क्षमता नभएका बालबालिकाको शैक्षिक केन्द्रका रूपमा रहेको विद्यालय हो।

सांकेतिक पुस्तक अभावमा विद्यालयमा गणित, विज्ञान, वातावरण शिक्षालगायतका विषयमा शिक्षकलाई अध्यापनमा समस्या हुने गरेको छ।

कक्षा १० सम्म अध्यापन गराइरहेका शिक्षकहरूमा विषयगत संकेत अभाव देखिने प्रधानाध्यापक कँडेलको भनाइ छ।

‘संकेत अभावले गर्दा शिक्षकले बुझाउन खोजेको शब्द विद्यार्थीले प्रष्ट बुझ्दैनन्। बुझाइएको शब्दले अर्को अर्थ लगाउन सक्ने जोखिम हुन्छ। विषयगत संकेत अभावले विद्यार्थीलाई प्रष्ट अर्थ जनाउन शिक्षकलाई गाह्रो पर्छ,’ उनले भने।

प्रअ कँडेलका अनुसार नेपालमा विषयगत संकेतका लागि कार्यक्रम सञ्चालन तथा अध्ययन अनुसन्धान सुरु नभएको मात्र होइन, विषयगत संकेतका विषयमा नेपालमा पुस्तकको पनि अभाव रहेको छ।

अन्य मुलुकमा विषयगत संकेतको व्यवस्था गरिएको भए पनि नेपालमा भने अन्य मुलुकको संकेतले काम गर्दैन।

‘पुराना शिक्षकलाई विज्ञान विषय अध्यापन गराउँदा समस्या उत्पन्न हुन्छ। यस विषयमा हामी शिक्षकले प्रयास पनि गरेका छौँ। सांकेतिक भाषाका लागि तालिम सञ्चालन गरेका थियौँ। शिक्षकहरूलाई विषयगत संकेतका लागि थप तालिमको आवश्यक छ,’ उनले भने।

प्रअ कँडेल सुन्न र बोल्न नसक्ने बालबालिकाको शैक्षिक केन्द्रका रूपमा स्थापित विद्यालय आफैंले भने सधै अभाव खेप्नुपरेको बताउछन्। वीरेन्द्रनगरमा रहेको यो विद्यालय अहिले सुन्ने र बोल्ने क्षमता नभएका बालबालिका अध्ययन गर्न एउटा मात्र विद्यालयका रूपमा छ।

सुर्खेतका बड्डीचौर, मालारानी र गुमीमा रहेको यस्ता प्रकृतिका विद्यालयहरू गाभेर यही विद्यालयमा ल्याइएको हो। अहिले पनि यो विद्यालय संघिय सरकारकै स्वामित्त्वमा रहेको छ।

विद्यालयको नौ कोठे भवनभित्र एउटा कोठामा कार्यालय सञ्चालनमा छ भने बाँकी कोठामा पठनपाठन हुने गर्छ।पानी पर्दा सबै कक्षाको छानोबाट पानी चुहिने समस्या छ।

गर्मीमा सिधै सूर्यको प्रकाश कोठाभित्रै पर्छ। शौचालय जीर्ण अवस्थामा छ भने खानेपानीको व्यवस्था नहुँदा विद्यार्थीलाई पसलबाट किनेर ल्याउनु पर्छ।

विशेष शिक्षामार्फत सञ्चालन भएको विद्यालयमा बहिरा विद्यार्थीलाई पढाउने शैक्षिक सामग्री नहुँदा अध्यापनमा समस्या परेको विद्यालयका अंग्रेजी शिक्षक रमेशकुमार कार्कीले बताए। सांकेतिक भाषाका लागि आवश्यक सामग्री नहुँदा पठनपाठनमा समस्या रहेको उनको भनाइ छ।

उनका अनुसार नेपालीमा अनुवाद गरी फेरि सांकेतिक रूपमा बुझाउन गाह्रो हुन्छ। सम्बन्धित विभागले नै पाठ्यक्रमअनुसार सांकेतिक संकेत चिन्हको विकास तथा अनुसन्धानमा ध्यान दिनुपर्ने उनको धारणा छ।

श्रवण शक्ति नभएका विद्यार्थीका लागि अध्ययन गर्ने प्रदेशकै एकमात्र विद्यालय भएकाले पनि यहाँ विद्यार्थी आउनेक्रम बढ्दो छ। आर्थिक अवस्था र पूर्वाधार नहुँदा विद्यालयमा दिनहुँ समस्या हुने गरेको छ।

प्रधानाध्यापक कँडेलका अनुसार वीरेन्द्रनगर नगरपालिकाले गत आर्थिक वर्षमा नयाँ भवनका लागि दिएको ५० लाख रुपैयाँले अहिले भवन बनिरहेको छ।

जीर्ण अवस्थामा रहेको प्रदेशकै एकमात्र बहिरा स्कुलको पूर्वाधार तथा शैक्षिक गुणस्तर विकासमा कुनै जनप्रतिनिधिको ध्यान नपुगेको अभिभावकको पनि गुनासो छ।

सांकेतिक भाषाको पठनपाठन हुने यस विद्यालयको पहिचान जोगाउन र विद्यालयको शैक्षिकस्तर सुधारका लागि राज्यले ध्यान दिनुपर्नेमा स्थानीय अभिभावक लक्ष्मी उपाध्याय जोड दिए।

‘राज्यले नै ध्यान नदिँदा बालबालिकाको पठनपाठन प्रभावित भइरहेको छ,’ उनले भने।

विद्यालयमा अध्ययनरत विद्यार्थीका लागि शैक्षिक सामग्री खरिद गर्न सरकारले प्रतिविद्यार्थी मासिक पाँचसय रुपैयाँ उपलब्ध गराउँदै आएको छ।

विद्यालयमा हाल सुर्खेत, दैलेख, कालिकोट, हुम्ला, डोल्पा, जाजरकोट, मुगु, सल्यान, बाँके, बर्दिया र कैलालीका विद्यार्थी अध्ययनरत छन्।

कूल ९६ जना विद्यार्थी अध्ययनरत सिद्ध बहिरा बाल स्कुलमा ४६ छात्रा र ५० छात्र रहेका छन्। यहाँ पाँच छात्र र नौ छात्रा गरी १४ दलित विद्यार्थी अध्ययरत छन्।

विद्यालयमा ८१ जना आवासीयरुपमै अध्ययन गरिरहेका छन् भने १५ जना घरबाटै आवतजावत गर्दै आएका छन्। विद्यालयमा सबैभन्दा धेरै दैलेख जिल्लाका ३४ जना विद्यार्थी अध्ययनरत छन् भने सुर्खेतका २८, कालिकोटका १५, हुम्लाका १५, जाजरकोटका चार, कैलालीका तीन, अछामका तीन, डोल्पाका दुई तथा मुगु र डोटीका एक/एक जना विद्यार्थी अध्ययनरत छन्।